O gecənin dəhşətləri unudulan deyil…
Bakı, 24 fevral, AZƏRTAC
Bir gecədə baş verən faciəli hadisələr illər, əsrlər boyu xalqımızın yaddaşında yaşayacaq. 26 fevral gecəsi dinc əhaliyə verilən işgəncələr amansız qətllər erməni xislətinin iç üzünü açıb göstərdi. Əli heç yerə çatmayan, köməksiz Xocalı sakinlərinə əzab vermək, qarlı çöllərə səpələnmiş adamlara sitəm etmək vandalizmin daha bir təzahürüdür. Mənim atam da həmin qanlı gecənin qurbanlarından olub. 1993-cü il iyulun 23-də isə əmilərim Vidadi və Hasil Ağdamı erməni işğalından qoruyarkən şəhid olublar. Onların bir gündə iki oğlunun cənazəsini qarşılayan anaları da bu ağır dərdə dözməyərək dünyadan gedib. Ailəmizin həyatında bu cür dəhşətli izlər qoyan faciələr Xocalı hadisələri ilə başlandı...
AZƏRTAC xəbər verir ki, bu sözləri 1992-ci il fevralın 26-na keçən gecə şəhid olan Xaqani Aslanovun oğlu Cəsarət Aslanov Müharibə, Əmək və Silahlı Qüvvələr Veteranları Təşkilatı ilə “Dayaq” Vətən Müharibəsi Əlillərinə və Şəhid Ailələrinə Dəstək Təşkilatının birgə təşkilatçılığı ilə Xocalı soyqırımının 31-ci ildönümü ilə əlaqədar keçirilən anım mərasimində deyib.
Anım tədbirinin iştirakçıları əvvəlcə Xətai rayonunda Xocalı soyqırımına həsr olunan “Ana harayı” abidə kompleksini ziyarət ediblər.
Mərasim Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü uğrunda döyüşlərdə həlak olanların xatirəsinin bir dəqiqəlik sükutla yad edilməsi ilə başlanıb.
Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov, “Dayaq” Vətən Müharibəsi Əlillərinə və Şəhid Ailələrinə Dəstək Təşkilatının sədri Qalib Əliyev, Şəhid Ailələrinə “Qayğı” Cəmiyyətinin sədri Müşfiq Əliyev, Nərimanov Rayon Ağsaqqallar Şurasının sədri Arif Hümbətov, Nərimanov Rayon Gənclər və İdman İdarəsinin rəisi Nəcəf Novruzov və başqaları çıxış edərək Xocalı soyqırımının erməni faşizminin ən qorxunc cinayətlərindən biri kimi Azərbaycan xalqının milli şüurunda daim yaşayacağını və heç vaxt unudulmayacağını söyləyiblər, Xocalı faciəsindən ətraflı bəhs edib, soyqırımı qurbanlarından Aslanov qardaşlarının başına gətirilən müsibət haqqında geniş məlumat veriblər.
Şəhid ailələrinin nümayəndələri çıxış edərək erməni vandalizmini lənətləyib, soyqırımı qurbanlarını sevgi və ehtiramla anıblar.
Mərasim Aslanov qardaşlarına həsr olunan videorolikin nümayişi ilə yekunlaşıb.
Bölmənin digər xəbərləri
