İDMAN
“Odlar Yurdu” boks klubu Almaniyada növbəti uğura imza atıb
Bakı, 25 noyabr, AZƏRTAC
Almaniyanın Maqdeburq şəhərində yerləşən “Odlar Yurdu” boks klubunun üzvləri növbəti uğura imza atıblar.
AZƏRTAC xəbər verir ki, klubun kiçik yaşlı üzvləri Dmutro Turkulets və Halili Bleorent Almaniyanın Görzig şəhərində keçirilən “Fuhne-Pokal 2024” turnirinin qalibi olublar.
“Odlar Yurdu”nun 4 idmançı ilə qatıldığı bu turnir uşaq və yeniyetmə boksçuların həvəslə mübarizə apardığı yarışdır. Builki turnirdə Almaniyanın müxtəlif şəhərlərindən 100-dən artıq idmançı iştirak edib. Bu turnirdə qalibiyyət boksçuların reytinq xallarına da təsir edir.
Yeri gəlmişkən, “Odlar Yurdu” klubunun üzvləri diaspora fəalları olaraq da gördükləri işlərlə seçilirlər. Noyabrın 22-də Halle şəhərində kişilər arasında keçirilən Almaniya çempionatını qeyd eləmək olar. Zalda Azərbaycan bayrağını dalğalandıran klub üzvləri çempionatda iştirak edən boksçumuz Ali Zamanova dəstək olublar. Ən sevindirici hal isə odur ki, A.Zamanov bu turnirdə qarşılaşdığı bütün rəqiblərinə qalib gələrək Almaniya çempionu olub.
