Oğuzda güclü külək nəticəsində meşə ərazisinə keçən yanğın söndürülüb
Bakı, 5 avqust, AZƏRTAC
Avqustun 5-i günorta saatlarında Oğuz rayonunun Söyüdlü, Qarabulaq və Kirovka kəndləri yaxınlığında biçilmiş taxıl sahələrində baş vermiş yanğın sonradan güclü külək nəticəsində meşə ərazisinə keçib. Ekologiya və Təbii Sərvətlər Nazirliyinin (ETSN) yerli qurumlarının əməkdaşları və Fövqəladə Hallar Nazirliyinin (FHN) Regional Dövlət Yanğından Mühafizə Xidmətinin şəxsi heyəti yanğını təxminən saat 17:00-da söndürüblər.
Bu barədə AZƏRTAC-a ETSN-in mətbuat katibi İradə İbrahimova məlumat verib.
Mətbuat katibinin sözlərinə görə, yanğın zamanı meşə fonduna aid 8 hektar ərazidə quru ot örtüyü və qaratikan, yemişan kolları yanıb. Eyni zamanda, bu gün Oğuzun Astraxanovka kəndi yaxınlığında da yanğın hadisəsi qeydə alınıb. Burada da yanğına səbəb biçənək sahəsinə od vurulması olub. ETSN-in yerli qurumlarının əməkdaşlarının və FHN-in yanğınsöndürənlərinin ciddi cəhdlərinə baxmayaraq, güclü küləyin təsirindən yanğın sürətlə yayılaraq Türyançay Dövlət Təbiət Qoruğunun ərazisinə keçib və 3 hektara yaxın quru ot örtüyü yanıb.
Təəssüf ki, hələ də taxıl biçinindən sonra ərazilərə od vurulur və nəticədə bu cür yanğın hadisələri baş verir.
Havaların isti və küləkli keçməsi ilə əlaqədar ETSN bir daha əhalini, fermerləri odla ehtiyatlı olmağa, taxıl biçinindən sonra ərazilərə od vurmamağa və yanğın təhlükəsizliyi qaydalarına riayət etməyə çağırır.
Bölmənin digər xəbərləri
