Ötən ay Bakı və Sumqayıtda əhaliyə 772 mindən çox tibbi xidmət göstərilib
Bakı, 17 iyul, AZƏRTAC
İcbari tibbi sığortanın tətbiq olunduğu tibb müəssisələri tərəfindən İcbari Tibbi Sığorta üzrə Dövlət Agentliyinə təqdim edilən ilkin hesabatlara əsasən, bu ilin iyun ayı ərzində Bakı tibbi ərazi bölməsi (TƏB) üzrə 219 min 294 və Sumqayıt TƏB-i üzrə 36 min 752 vətəndaşa ümumilikdə 772 min 167 tibbi xidmət göstərilib.
Agentliyin Marketinq və ictimaiyyətlə əlaqələr departamentindən AZƏRTAC-a verilən məlumata görə, bu müddətdə tibb müəssisələri, onların struktur bölmələri və müalicə diaqnostika mərkəzlərinə 417 min 557 müraciət daxil olub. Müraciətlər üzrə göstərilən tibbi xidmətlərin 621 min 524-ü ambulator, 150 min 643-ü isə stasionar şəraitdə göstərilib.
Bakı TƏB-i üzrə əhalinin hər 1000 nəfərinə tibb müəssisələrinə olunan müraciət sayına əsasən ilk onluqda yer alan rayonlar: Nərimanov (302), Yasamal (266), Sabunçu (249), Pirallahı (230), Xəzər (180), Nəsimi (163), Səbail (155), Suraxanı (129), Xətai (85) və Binəqədi (61).
Sumqayıt TƏB-i üzrə əhalinin hər 1000 (min) nəfərinə tibb müəssisələrinə olunan müraciət sayı 94 təşkil edib.
Ən çox xidmət göstərmiş tibb müəssisələrinin ilk onluğu: Sumqayıt Tibb Mərkəzi (97 min 417), Akademik M.Ə.Mirqasımov adına Respublika Klinik Xəstəxanası (86 min 608), 5 nömrəli Şəhər Klinik Xəstəxanası (65 min 773), 3 nömrəli Şəhər Klinik Xəstəxanası (48 min 419), K.Y.Fərəcova adına Elmi-Tədqiqat Pediatriya İnstitutu (41 min 776), Kliniki Tibbi Mərkəz (40 min 127), Ə.D.Məlikov adına 6 nömrəli Birləşmiş Şəhər Xəstəxanası (24 min 711), 26 nömrəli Birləşmiş Şəhər Xəstəxanası (18 min 898), Akademik C.M.Abdullayev adına Elmi-Tədqiqat Kardiologiya İnstitutu (17 min 618) və 13 nömrəli Uşaq Poliklinikası (12 min 813).
Ən çox ambulator xidmət göstərmiş tibb müəssisələrinin ilk onluğu: Sumqayıt Tibb Mərkəzi, Akademik M.Ə.Mirqasımov adına Respublika Klinik Xəstəxanası, 5 nömrəli Şəhər Klinik Xəstəxanası, 3 nömrəli Şəhər Klinik Xəstəxanası, K.Y.Fərəcova adına Elmi-Tədqiqat Pediatriya İnstitutu, Kliniki Tibbi Mərkəz, Ə.D.Məlikov adına 6 nömrəli Birləşmiş Şəhər Xəstəxanası, Akademik C.M.Abdullayev adına Elmi-Tədqiqat Kardiologiya İnstitutu, 13 nömrəli Uşaq Poliklinikası və 26 nömrəli Birləşmiş Şəhər Xəstəxanası.
Ən çox stasionar xidmət göstərmiş tibb müəssisələrinin ilk onluğu: Akademik M.Ə.Mirqasımov adına Respublika Klinik Xəstəxanası, Sumqayıt Tibb Mərkəzi, K.Y.Fərəcova adına Elmi-Tədqiqat Pediatriya İnstitutu, Kliniki Tibbi Mərkəz, 5 nömrəli Şəhər Klinik Xəstəxanası, Ə.D.Məlikov adına 6 nömrəli Birləşmiş Şəhər Xəstəxanası, 3 nömrəli Şəhər Klinik Xəstəxanası, 26 nömrəli Birləşmiş Şəhər Xəstəxanası, M.Ə.Əfəndiyev adına 2 nömrəli Şəhər Klinik Xəstəxanası və Elmi-Tədqiqat Travmatologiya və Ortopediya İnstitutu.
Bakı və Sumqayıt TƏB-ləri üzrə tibb müəssisələrinə müraciətlərin çoxu tibbi müayinə (hərbi xidmətə çağırılanların müayinəsi daxil olmaqla), qan dövranı sistemi xəstəlikləri, endokrin sistemin xəstəlikləri, maddələr mübadiləsi və qidalanma pozğunluğu, sümük və əzələ sisteminin və birləşdirici toxumanın xəstəlikləri, həzm, tənəffüs sistemi xəstəlikləri, gözün və gözün əlavə aparatının xəstəlikləri, sinir sistemi, sidik-cinsiyyət sistemi xəstəlikləri, habelə mamalıq və ginekologiya ilə bağlı olub.
2021-ci ilin iyun ayı ərzində Bakı TƏB üzrə 666 min 811, Sumqayıt TƏB üzrə isə 105 min 356 tibbi xidmət göstərilib.
Ötən ilin yanvarın 1-nə olan rəsmi məlumata əsasən Bakı və Sumqayıt TƏB-ləri üzrə qeydiyyatda olan əhalinin sayı 3 milyon 47 min nəfər təşkil edir.
Bölmənin digər xəbərləri
