Ötən il Almaniyada 200 minə yaxın şirkət fəaliyyətini dayandırıb
Berlin, 21 may, AZƏRTAC
Ötən il Almaniyada 196,1 min şirkət fəaliyyətini dayandırıb. Bu, 2023-cü illə müqayisədə 16 faiz çoxdur. Eyni zamanda, bu göstərici qlobal maliyyə böhranının təsirlərinin hiss olunduğu 2011-ci ildən bəri qeydə alınan ən yüksək rəqəmdir.
AZƏRTAC yerli mediaya istinadla xəbər verir ki, qeyd olunan statistika “Creditreform” məlumat agentliyi və Avropa İqtisadi Araşdırmalar Mərkəzinin (ZEW) hesabatında öz əksini tapıb.
Fəaliyyətini dayandıran şirkətlər təkcə ənənəvi sahələri deyil, həm də gələcək üçün vacib olan sektorları əhatə edir. Belə ki, enerji sektorunda fəaliyyət göstərən 1050 şirkət bağlanıb ki, bu da 2023-cü ilə nisbətən 26 faiz çoxdur. Əczaçılıq, kimya sənayesi, səhiyyə sahəsində də fəaliyyətini dayandıran müəssisələrin sayı çoxdur.
Bundan başqa, IT, məhsul inkişafı, ətraf mühit texnologiyası və diaqnostika sahələrində bağlanan şirkətlərin sayı 25 faiz artaraq 13 min 800-ə çatıb.
Bağlanan müəssisələr əsasən kiçik biznes sahəsinə aid olsa da, son illərdə fəaliyyətini dayandıran müəssisələrin də sayı artır. Müəssisələrin bağlanması təkcə müflisləşmə ilə bağlı deyil. Sahibkarlar bəzən varis tapa bilmədiyi üçün və ya təqaüdə çıxmaq istədiyindən könüllü olaraq işlərini dayandırırlar.
Bəzi şirkətlərin hələ də mənfəət əldə etməsinə baxmayaraq, bu gəlirlərin uzunmüddətli perspektivi zəif olduğundan onlar da fəaliyyətlərinə xitam verirlər.
Berlin
Bölmənin digər xəbərləri
