Pakistanda silahlıların hərbi bazaya hücumu nəticəsində üç təyyarə zədələnib
Bakı, 4 noyabr, AZƏRTAC
Pakistanın şimal şərqindəki Pəncab əyalətinin Mianvali şəhəri yaxınlığında silahlıların Hərbi Hava Qüvvələrinin bazasına hücumu nəticəsində üç təyyarə və yanacaq dolduran texnika zədələnib.
AZƏRTAC xəbər verir ki, bu barədə Pakistan Müdafiə Nazirliyinin ictimaiyyətlə əlaqələr idarəsi məlumat yayıb. Məlumata görə, bazaya daxil olmağa cəhd edən üç terrorçu öldürülüb, üçü isə mühasirəyə alınıb.
Hücumun məsuliyyətini ölkədə fəaliyyət göstərən “Təhrik-i-Cihad Pakistan” qruplaşması üzərinə götürüb.
Bir müddət öncə qruplaşma Bəlucistan və Xeybər-Pahtunhva əyalətlərində bir neçə hücum həyata keçirib. Onlar Qvadar dairəsində (Bəlucistan) təhlükəsizlik qüvvələrinin avtomobil karvanına hücum edib və Dəra-İsmayıl-Xan şəhəri yaxınlığında əldəqayırma partlayıcı qurğunu işə salıb. Hücumlar nəticəsində 17 hərbçi həlak olub, 24 nəfər isə yaralanıb.
Bölmənin digər xəbərləri
