PAN Gİ MUN YAPONİYA SİYASƏTÇİLƏRİNİN ÇAĞIRIŞINDAN NARAHATDIR
AZƏRTAC-ın İTAR-TASS-dan aldığı xəbərə görə, Koreya Respublikasının xarici işlər və xarici ticarət naziri Pan Gi Mun bəzi yapon siyasətçilərinin KXDR-dəki nüvə sınaqları ilə əlaqədar ölkənin nüvə silahına malik olmaq məsələsi ətrafında geniş müzakirələr aparmaq çağırışlarından narahatlıq keçirdiyini bildirmişdir. Pan Gi Mun noyabrın 6-da Tokioda mətbuat konfransında demişdir: “Mən təkcə Koreya Respublikasının xarici işlər naziri kimi deyil, həm də BMT-nin gələcək baş katibi kimi narahatlığımı bildirirəm. Yaponiya bu təşkilatın vacib üzvlərindən biri və Şimali-Şərqi Asiyada mühüm oyunçudur. Hər halda, nüvə mövzusunun müzakirəsi Yaponiyaya yaxşı heç nə verməyəcəkdir”.
Koreya naziri qeyd etmişdir ki, Yaponiya, ilk növbədə, altıtərəfli danışıqların köməyi ilə KXDR-də nüvə proqramlarının gerçəkləşməsinə yol verməməyə çalışmalıdır.
Bölmənin digər xəbərləri
