PARİSDƏ “AZƏRBAYCAN HAVA YOLLARI”NIN OFİSİ AÇILMIŞDIR
Parisdə “Azərbaycan Hava Yolları” Dövlət Konserninin ofisi açılmışdır. Konsernin Fransadakı nümayəndəsi Əziz İsmayılov AZƏRTAC-ın müxbiri ilə söhbətində demişdir ki, əvvəllər Fransa ilə Azərbaycan arasında birbaşa hava rabitəsi olmadığından bu istiqamətlərdə uçan sərnişinlər müxtəlif ölkələrin hava yolları şirkətlərinin xidmətindən istifadə edirdilər. Bu isə sərnişinlər üçün müəyyən çətinliklər yaradırdı. Ötən ilin fevral ayından Parislə Bakı arasında birbaşa uçuşlar təşkil edilmişdir. Lakin ilk vaxtlar Parisdəki nümayəndəliyimizin ofisi olmadığına görə, bilet alan sərnişinlər bəzi problemlərlə qarşılaşırdılar. Belə vəziyyət sərnişinlərin haqlı narazılığına səbəb olur və daşınmaların həcminə mənfi təsir göstərirdi.
Bunu nəzərə alaraq, konsernin rəhbərliyi Parisdə ofis açdı. İndi Paris-Bakı marşrutu ilə birbaşa uçan sərnişinlərin sayı gündən-günə artmaqdadır. Yay mövsümü ilə əlaqədar Parisdən Bakıya təyyarələr sərnişinlə dolu yola salınır. Uçuş zamanı sərnişinlərə yüksək səviyyədə xidmət göstərilir, arzu və istəkləri dərhal yerinə yetirilir.
Sərnişinlərə daha yaxşı xidmət göstərmək üçün ofisdə əvvəlcədən bilet sifarişləri qəbul edilir. Avqust ayının ilk günləri üçün indidən bütün biletlər satılmışdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
