PARLAMENT XƏBƏRLƏRİ
Milli Məclisin deputatları Gültəkin Hacıyeva və Rəfael Hüseynov Avropa Şurası Parlament Assambleyasının Hüquqi Məsələlər və insan Hüquqları Komitəsinin martın 3-4-də Parisdə keçiriləcək iclasında iştirak edəcəklər.
Milli Məclisin mətbuat xidmətindən AZƏRTAC-a bildirmişlər ki, iclasda Azərbaycanda məhbusların vəziyyəti, Çeçenistanda insan hüquqlarının qorunması, demokratik cəmiyyətdə prokurorluğun rolu, İnsan Hüquqları Haqqında Avropa Konvensiyasının tətbiq edilmədiyi ərazilər barədə məsələlər müzakirə ediləcək, İnsan Hüquqları üzrə Avropa Məhkəməsi hakimlərinin seçilməsi haqqında fikir mübadiləsi aparılacaqdır.
X x x
Milli Məclisin deputatı Əli Abbasov Avropa Şurası Parlament Assambleyasının Mədəniyyət, Elm və Təhsil Komitəsinin iclasında iştirak etmək üçün martın 4-dən 6-dək Parisdə səfərdə olacaqdır.
Komitənin iclasında Cənubi Qafqazda mədəniyyətin vəziyyəti, bu sahənin çoxşaxəli inkişafı məsələləri müzakirə olunacaqdır.
X x x
Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov və deputat Asim Mollazadə Avropa Şurası Parlament Assambleyasının Siyasi İşlər Komitəsinin martın 5-6-da Parisdə keçiriləcək iclasında iştirak edəcəklər.
Komitənin iclasında təşkilatın Dağlıq Qarabağ üzrə məruzəçisi Terri Devisin ATƏT-in Minsk qrupu həmsədrləri ilə son görüşləri barədə məlumatı dinləniləcək, Çeçenistan münaqişəsi, milli azlıqların hüquqlarının qorunması və İraqla bağlı məsələlər müzakirə olunacaqdır.
Avropa Şurası Parlament Assambleyasının komitələrində müzakirəyə çıxarılacaq məsələlərlə əlaqədar deputatlar çıxış edəcək, rəy və təkliflərini bildirəcəklər.
Bölmənin digər xəbərləri
