“PAYIZ KUBOKU” TURNİRİNİN QALİBLƏRİ MÜKAFATLANDIRILMIŞLAR
Bakı, 19 dekabr (AZƏRTAC). “İrəli” İctimai Birliyi və Xəzər İntellektual Gənclər Klubu (XİGK) Gənclər və İdman Nazirliyinin təşkilatçılığı ilə Azərbaycanın bütün bölgələrində, ali məktəblərdə gənclərin intellektual inkişafını stimullaşdırmaq məqsədi ilə “Nə? Harada? Nə zaman?” intellektual layihəsini həyata keçirir. Layihə çərçivəsində noyabrın 15-də Bakıda “Payız kuboku” turnirinin final mərhələsi keçirilmişdir.
Dekabrın 19-da “İrəli” İctimai Birliyində turnirin qaliblərinin mükafatlandırılması mərasimi olmuşdur.
Tədbirdə “İrəli”nin sədri Ceyhun Osmanlı, XİGK-nin sədri Seymur Teymurov layihənin əhəmiyyətindən və vacibliyindən danışmışlar. Bildirmişlər ki, “Payız kuboku” turnirinin məqsədi gənclərin intellektual potensialını üzə çıxarmaq, elmi biliklərini genişləndirmək, komanda işini təbliğ etmək olmuşdur. Final mərhələsində 30 komanda iştirak etmişdir. Yarışda 1-ci yeri Azərbaycan Dövlət Neft Akademiyasının “Maqnat” komandası, 2-ci yeri Sumqayıtın “Sunreturn” komandası, 3-cü yeri isə Bakı Dövlət Universitetinin “İstiqlal” komandası tutmuşlar.
Qaliblər kubok, medal, sertifikat və qiymətli hədiyyələrlə mükafatlandırılmışlar.
Xatırladaq ki, “Nə? Harada? Nə zaman?” intellektual layihəsi çərçivəsində “Qış kuboku” turnirinə start verilir.
######
Bölmənin digər xəbərləri
