Paytaxt üzrə 5017 şagird fənn olimpiadalarının yarımfinal turunda
Bakı, 7 fevral, AZƏRTAC
Respublika fənn olimpiadalarının yarımfinal turuna qeydiyyat başlayıb.
Bakı Şəhəri üzrə Təhsil İdarəsindən (BŞTİ) AZƏRTAC-a bildirilib ki, qeydiyyat www.olimpiada.edu.az saytı vasitəsilə fevralın 15-dək davam edəcək.
Yarımfinal turuna rayon (şəhər) mərhələsində uğur qazanan və ötən tədris ili üzrə beynəlxalq fənn olimpiadalarında qalib gəlmiş şagirdlər cəlb olunacaq.
Olimpiadada BŞTİ-nin tabeliyindəki ümumi təhsil müəssisələrindən Azərbaycan dili və ədəbiyyat fənni üzrə 1257, riyaziyyat fənni üzrə 1283, informatika fənni üzrə 155, fizika fənni üzrə 404, kimya fənni üzrə 604, biologiya fənni üzrə 376, tarix fənni üzrə 458, coğrafiya fənni üzrə 480 nəfər olmaqla, ümumilikdə 5017 şagird iştirak edəcək.
Qeyd edək ki, olimpiadaların təşkilində məqsəd istedadlı uşaqların aşkar edilməsi, şagirdlərdə fənlərə olan marağın artırılması, onların sağlam rəqabət mühitində öz bilik və bacarıqlarını nümayiş etdirmələrinə imkan yaradılmasından ibarətdir.
Respublika fənn olimpiadaları “Kapital Bank”ın sponsorluğu ilə təşkil olunur.
Bölmənin digər xəbərləri
