Penitensiar Xidmətdə məhkumların valideynləri və ailə üzvləri ilə növbəti görüş olmuşdur
Bakı, 21 noyabr (AZƏRTAC). Penitensiar Xidmətin rəhbər şəxsləri ilə məhkumların valideynləri, ailə üzvləri və yaxın qohumları arasında görüş keçirilmişdir.
Qurumun ictimaiyyətlə əlaqələr şöbəsindən AZƏRTAC-a bildirmişlər ki, Penitensiar Xidmətin rəis müavinləri ədliyyə general-mayoru Hüseyn Əlixanov və ədliyyə polkovniki Nizaməddin Cəlilov müraciət edən məhkumların ailə üzvləri və yaxın qohumları ilə görüşmüş, onların müraciət və şikayətlərinin əksəriyyəti yerində həll olunmuşdur. Eləcə də həmin şəxsləri narahat edən problemlər, maraqlandıran suallar, hüquqi prosedurlar barədə geniş izahat verilmişdir.
Müraciətlər əsasən əfv olunma, vaxtından əvvəl şərti azadetmə, məntəqə tipli cəzaçəkmə müəssisəsinə və başqa cəzaçəkmə müəssisələrinə keçirilmə, məhkumların səhhəti ilə bağlı cəzadan azad olunması və digər məsələləri əhatə etmişdir.
Məhkumların və təqsirləndirilən şəxslərin saxlanma şəraiti ilə bağlı və xidmət əməkdaşlarının hər hansı hərəkətləri barədə şikayətlər daxil olmamışdır.
Təqdim olunmuş müraciətlər qeydə alınmış və nəzarətə götürülərək icra üçün müvafiq xidmət sahələrinə yönəldilmişdir.
Bölmənin digər xəbərləri
