Penitensiar Xidmətdə qulluğa qəbul edilmiş gənc əməkdaşların andiçmə mərasimi olmuşdur
Bakı, 21 noyabr (AZƏRTAC). Ədliyyə Nazirliyinin Penitensiar Xidmətində kiçik rəis heyətinə qulluğa qəbul olunmuş 104 nəfər gənc əməkdaşın andiçmə mərasimi keçirilmişdir.
Qurumun ictimaiyyətlə əlaqələr şöbəsindən AZƏRTAC-a bildirmişlər ki, gənc əməkdaşlar ədliyyə orqanlarında qulluq keçərkən Azərbaycan Respublikasına sadiq olacaqlarına, Konstitusiyaya dönmədən əməl edəcəklərinə, dövlət sirrini və xidməti sirri qoruyacaqlarına, hüquq və vəzifələrini qərəzsiz, vicdanla, qanuna tam uyğun həyata keçirəcəklərinə, ədliyyə işçisinin şərəf və ləyaqətini uca tutacaqlarına and içmişlər.
İlkin hazırlıq kursunu keçərək penitensiar müəssisələrə təyin olunmuş əməkdaşların andiçmə mərasimində ədliyyə nazirinin müavini, Penitensiar Xidmətin rəisi, ədliyyə general-leytenantı Mədət Quliyev çıxış etmişdir. M.Quliyev xidmətə yeni başlayan əməkdaşları ədliyyə naziri, I dərəcəli dövlət ədliyyə müşaviri Fikrət Məmmədovun adından ədliyyə işçilərinin peşə bayramı günü münasibətilə təbrik etmiş, qurumda aparılan islahatlar barədə məlumat vermiş və onlara gələcək işlərində uğurlar diləmişdir.
Daha sonra gənc əməkdaşlara xidməti vəsiqələr və ilkin hazırlıq kursunu bitirmələri barədə şəhadətnamələr təqdim olunmuşdur.
Bölmənin digər xəbərləri
