PEŞƏ ÖYRƏNƏN GƏNCLƏRƏ SERTİFİKATLAR VERİLMİŞDİR
Gəncə, 14 oktyabr (AZƏRTAC). Gəncədə Gənclərin Məşğulluq Resurs Mərkəzinin peşə-sənət kurslarını uğurla bitirən məzunlara sertifikatlar verilməsi və mərkəzin 9 aylıq fəaliyyəti ilə bağlı yığıncaq keçirilmişdir.
Azərbaycan Dövlət Aqrar Universitetində keçirilən tədbirdə əvvəlcə mərkəzin fəaliyyətindən bəhs edən sənədli film nümayış etdirilmişdir. Sonra Avropa Komissiyasının nümayəndəsi Jan Luis Lavrov, Azərbaycan Respublikası Gənclər və İdman Nazirliyinin nümayəndəsi Rüstəm Abdullayev, Gəncə Şəhər İcra Hakimiyyətinin şöbə müdiri Ruslan Qardaşov çıxış edərək “Gələcəyə körpü” Gənclər İctimai Birliyinin həyata keçirdiyi layihənin əhəmiyyətindən danışmışlar.
Sonra biznes strukturlarının, ali təhsil müəssisələrinin, eləcə də qeyri-hökumət təşkilatlarının nümayəndələri çıxış edərək gənclərə peşə yönümü istiqamətində yardımçı olan bu layihəyə münasibətlərini bildirmiş və layihənin gələcəkdə də davam etdirilməsinin vacibliyini vurğulamışlar.
Gənclərin Məşğulluq Resurs Mərkəzinin peşə-sənət kurslarını bitirən 100 nəfərədək məzuna sertifikatlar təqdim olunmuşdur.
Bölmənin digər xəbərləri
