Politoloq: Azərbaycanın yürütdüyü uğurlu siyasət nəticəsində Cənubi Qafqaz təhlükəsiz regiona çevrilməkdədir
Bakı, 10 yanvar, AZƏRTAC
Prezident İlham Əliyev ənənəvi olaraq ilin son dəqiqələrində Dünya Azərbaycanlılarının Həmrəyliyi və Yeni il münasibətilə bütün həmvətənlərimizi təbrik etdi. İkinci Qarabağ müharibəsindəki tarixi Zəfərimizdən sonra artıq ikinci dəfə qalib ölkənin başçısı kimi həmrəylik və yeni il münasibətilə bütün dünyadakı azərbaycanlılara müraciət edən Azərbaycan Prezidenti bir sıra önəmli məqamlara toxundu. İşğalçı və təcavüzkar Ermənistan üzərində döyüş meydanında Qələbəmizin davamı olaraq 2021-ci il ərzində siyasi və diplomatik müstəvidə baş verən əhəmiyyətli hadisələrdən və qazanılan uğurlardan danışdı. Dövlətimizin başçısının müraciətindən anlaşılan əsas məqamlardan biri də o oldu ki, müharibə meydanında düşmən üzərində qazanılan Qələbəmizdə ölkə daxilində bütün istiqamətlərdə, o cümlədən də ordu quruculuğu ilə bağlı yürüdülən düzgün siyasət olsa da, həmin Zəfərimizin beynəlxalq aləmdə qəbul etdirilməsi də daxil olmaqla, siyasi və diplomatik müstəvidə qazanılan nailiyyətlər uğurlu diplomatiya və uzaqgörən xarici siyasət sayəsində əldə edilib.
Bu fikirləri AZƏRTAC-a açıqlamasında Siyasi və Hüquqi Araşdırmalar Mərkəzinin sədri politoloq Xəyal Bəşirov bildirib.
Politoloq diqqətə çatdırıb ki, dünyanın Azərbaycan ərazilərinin bir hissəsinin 30 ilə yaxın işğal altında qalmasına ikili və ədalətsiz yanaşmasına rəğmən, ölkəmiz xarici siyasət kursunda əməkdaşlığı gücləndirdi və dünyanın demək olar bütün nüfuzlu təşkilatları, o cümlədən BMT ilə əlaqələrini inkişaf etdirilməsini diqqətdə saxladı. Azərbaycan bu təşkilatların bir çoxunda sədr mövqeyinə, digərlərində isə əsas söz sahiblərindən birinə çevrildi. “Prezident İlham Əliyevin bilavasitə rəhbərliyi ilə yürüdülən praqmatik xarici siyasət və uğurlu diplomatiya sayəsində Azərbaycan 2012-ci ildə iki il müddətinə BMT Təhlükəsizlik Şurasının qeyri-daimi üzvü seçildi. Elə həmin ildə ölkəmiz bu quruma sədrliyi ABŞ-dan təhvil aldı və sonradan Çinə ötürdü”, - deyən X.Bəşirovun sözlərinə görə, dünyanın ən nüfuzlu və ən böyük təşkilatının aparıcı qurumuna sədrlik edən Azərbaycan bu tarixi imkandan maksimum faydalanaraq qlobal müstəvidə baş verən prosesləri öz xeyrinə istiqamətləndirmək üçün əhəmiyyətli addımlar atdı.
Ölkəmizin dünyanın ən nüfuzlu siyasi və iqtisadi təşkilatlarından olan Avropa İttifaqı, Avropa Şurası, NATO, İslam Əməkdaşlıq təşkilatı, Qoşulmama Hərəkatı, Türk Dövlətləri Təşkilatı və digərləri ilə çox sıx əməkdaşlıq yolunu seçdiyini diqqətə çatdıran politoloq vurğulayıb ki, məhz bu uğurlu proses dönəmində Azərbaycan Türk Şurasına rəhbərlik etdi və hazırda təsir dairəsinə görə dünyada BMT-dən sonra ikinci təşkilat olan Qoşulmama Hərəkatı sədrlik etməkdədir. Aparıcı dövlətlərlə və nüfuzlu təşkilatlarla aparılan sıx əməkdaşlıq və bu proses nəticəsində qazanılmış siyasi və diplomatik uğurlar ən böyük problemimizin həlli üçün ciddi zəmin yaratdı. Bu yolla Azərbaycan həm də təxminən 30 il ərzində keçmiş Qarabağ münaqişəsini beynəlmiləlləşdirməyə çalışan Ermənistanın 44 günlük müharibə zamanı meydanda tək qalmasına nail oldu.
X.Bəşirov vurğulayıb ki, Azərbaycan BMT Təhlükəsizlik Şurasının 30 ilə yaxın müddətdə kağız üzərində qalan qətnamələrinin yerinə yetirən 10 noyabr bəyanatının imzalanmasına nail oldu. Həmin Bəyanatla, həmçinin ondan sonra Moskva və Soçi şəhərlərində imzalanan bəyanatlarla və Brüsseldə Prezident İlham Əliyevin keçirdiyi görüşlərin nəticələrinə əsasən biz Qələbəmizin beynəlxalq ictimaiyyət tərəfindən qəbul edilməsinə nail olduq. Digər tərəfdən, BMT kimi nüfuzlu təşkilatın Təhlükəsizlik Şurasının imperativ xarakterli qətnamələrinin icra mexanizmində ciddi problemlərin olduğu faktını ortaya qoyduq.
Politoloq, həmçinin bildirib ki, Prezident İlham Əliyev hər bir azərbaycanlı üçün müqəddəs hesab olunan Şuşa şəhərinin işğaldan azad edilməsinin 270 illiyi münasibətilə hər birimizin ürəyincə olan bir addım ataraq bu ili “Şuşa İli” elan etdi. Bununla da Azərbaycan regionumuzla bağlı bəzi məkrli planlar və hiyləgər oyunlar nəticəsində yerindən oynadılan daşları öz yerinə qoymaqdadır. “Prezident İlham Əliyevin rəhbərliyi ilə Azərbaycan dövlətinin həyata keçirdiyi və müttəfiqlərimiz tərəfindən ciddi şəkildə dəstəklənən siyasətimiz nəticəsində təkcə ölkəmiz deyil, ümumilikdə Cənubi Qafqaz regionu sülh və təhlükəsizlik regionuna çevrilməkdədir. Bu proseslərin məntiqi nəticəsi kimi daim maraqların toqquşduğu Cənubi Qafqaz çox qısa zamanda böyük siyasi və iqtisadi maraqların uzlaşması regionuna çevrilməklə sülhün, təhlükəsizliyin və dayanıqlı inkişafın ən yüksək səviyyədə təmin olunduğu coğrafi məkan olacaq”, - deyə politoloq əlavə edib.
Bölmənin digər xəbərləri
