Prezident İlham Əliyev: Azərbaycan ilə Macarıstan arasındakı münasibətlərin dinamik inkişafı məmnunluq doğurur
Bakı, 14 mart, AZƏRTAC
Azərbaycan ilə Macarıstan arasındakı münasibətlərin dinamik inkişafı məmnunluq doğurur. Siyasi, iqtisadi və mədəni sahələrdə daim genişlənən əlaqələrimiz çoxtərəfli qaydada fəal əməkdaşlığımız ilə müşayiət olunur.
AZƏRTAC xəbər verir ki, bu fikirlər Azərbaycan Prezidenti İlham Əliyevin Macarıstanın yeni seçilmiş Prezidenti Katalin Novaka təbrik məktubunda yer alıb.
Təbrik məktubunda daha sonra deyilir: “İnanıram ki, bu il diplomatik münasibətlərin qurulmasının 30 illiyini qeyd edəcək ölkələrimiz arasında ənənəvi dostluğun daha da möhkəmləndirilməsi, strateji tərəfdaşlığın bundan sonra da müvəffəqiyyətlə davam etdirilməsi üçün birgə səylər göstərəcəyik”.
Dövlətimizin başçısı xanım Novaka möhkəm cansağlığı və xoşbəxtlik, dost Macarıstan xalqının rifahı naminə məsul fəaliyyətində uğurlar diləyib.
Bölmənin digər xəbərləri
