Prezident İlham Əliyevin Şuşada səsləndirdiyi fikirlər qlobal əhəmiyyətli araşdırmaların istinad mənbəyidir
Bakı, 4 may, AZƏRTAC
Prezident İlham Əliyevin “Böyük Avrasiya geosiyasətinin formalaşması: keçmişdən bu günə və gələcəyə” mövzusunda Şuşada keçirilən dördüncü beynəlxalq konfransda dünyanın aparıcı beyin mərkəzlərinin təmsilçilərinin qlobal proseslərin ən müxtəlif istiqamətlərini əks etdirən suallarına cavabında səsləndirdiyi fikirlər dövlətimizin başçısının mövcud və gələcək geosiyasi konfiqurasiya ilə bağlı nə qədər dərin və aydın təsəvvürlərə malik olduğunu bir daha nümayiş etdirdi.
Bunu AZƏRTAC-a açıqlamasında siyasi ekspert Elçin Mirzəbəyli deyib.
Onun sözlərinə görə, ADA Universitetinin təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş tədbirdə Prezident İlham Əliyevin suallara cavablarında yer alan, uzaq və yaxın tarixi gerçəklikləri, bu günümüzün geosiyasi mənzərəsini və bütövlükdə Avrasiyanın gələcəyi ilə bağlı reallıqları əks etdirən məqamlar dünyanın aparıcı beyin mərkəzlərinin analitiklərinin təhlil və proqnozları üçün mühüm əhəmiyyətə malikdir.
“Dövlətimizin başçısının daha əvvəl keçirilən konfranslarda səsləndirdiyi fikirlərin uzun müddət qlobal əhəmiyyətli araşdırmaların istinad mənbəyinə çevrildiyinin artıq şahidiyik. Onun analitiklərin suallarına cavabları kifayət qədər çoxşaxəli və əhatəli olduğu üçün diqqəti daha çox dövlətimizin başçısının ABŞ-ın Ceymstaun Fondunun baş elmi işçisi Vladimir Sokorun sualına cavabında səsləndirdiyi fikirlərə yönəltmək istəyirəm. Azərbaycanın NATO-ya üzv ölkə və regional güc olan Türkiyə ilə Avroatlantik Alyansdan kənar müttəfiqlik münasibətlərinə malik olmasını əks etdirən sual və bu həssas mövzuya Prezident İlham Əliyevin mükəmməl şəkildə aydınlıq gətirməsi, əslində Azərbaycanın xarici siyasət kursunun ən dərin qatlarını əks etdirməklə yanaşı, strateji baxımdan nə qədər dəqiq düşünüldüyünü sübuta yetirir. SSRİ-nin süqutundan sonra ciddi və dağıdıcı kataklizmlərin içərisindən Ulu Öndər Heydər Əliyevin strateji zəkası və xarakteri, Prezident İlham Əliyevin uzaqgörənliyi və dəmir məntiqə söykənən liderliyi ilə sıyrılmağı bacaran Azərbaycan özündən postsovet məkanının bəzi aktorları kimi geosiyasi qütblərin nüfuz savaşının təzyiq və təsir elementi kimi istifadəsinə imkan vermədi və coğrafi mövqeyini, təbii resurslarını geostrateji faktora çevirməyi bacardı”, - deyə E.Mirzəbəyli diqqətə çatdırıb.
Siyasi ekspert vurğulayıb ki, Azərbaycan kütləvi siyasi səhnələrdə, sadəcə, fon yarada biləcək oyunçu kimi görüntü yaratmaqdan imtina etdi və təhlükəsizliyini yalnız öz milli maraqlarına söykənən bərabərhüquqlu münasibətlər müstəvisindən inkişaf etdirmək yolunu seçdi. Fikirlərimi əsaslandırmaq üçün, Prezidentin Vladimir Sokorun sualına cavabından iqtibas gətirmək istəyirəm. Sitat: “…Keçmiş Sovetlər İttifaqına daxil olan müxtəlif ölkələrdə Avroatlantik inteqrasiyaya və əməkdaşlığa gedən yola dair müəyyən miskonsepsiya mövcud idi. İstər bu NATO, istərsə də Avropa İttifaqı olsun. Bəli, Azərbaycan rəsmi olaraq istənilən növ razılaşmalara daxil olmadı. Biz hətta “Şərq tərəfdaşlığı” Proqramına üzv olan bəzi dövlətlərdən fərqli olaraq Avropa İttifaqı ilə Assosiasiya sazişinə imza atmadıq. Lakin biz bunu onlarla yaxın olmaq istəmədiyimizə görə etmədik. Biz vahid əməkdaşlıq formatına malik olmaq istəmirik. Fikrimcə və mən bunu tam səmimiyyətlə deyirəm assosiasiya sazişi, sözün əsl mənasında, saziş deyil. Bu, sadəcə, bir sözdür. Bu, həmin formata qoşulmuş ölkələrə təqdim olunmuş, sadəcə, təlimatlardan ibarət bir siyahıdır. Bu, onların seçimidir və biz ona hörmətlə yanaşırıq. Lakin bu, bizim seçimimiz deyil”.
Elçin Mirzəbəylinin sözlərinə görə, Azərbaycan liderinin müstəqil xarici siyasət kursunun uğurunun sirrini də məhz, bizə təqdim olunan “seçim”lərdə, ilğım perspektivlərdə deyil, real, praqmatik, milli maraqlara söykənən müstəqil seçimdə axtarmaq lazımdır. Azərbaycanın müstəqil siyasətinin təməlində müstəqil seçim imkanının əsas amil, dövlət siyasətinin ana xətti kimi daim qorunub saxlanılması və geosiyasi reallıqlara uyğun olaraq, dəqiq və çevik bir şəkildə, manipulyasiyalara yol verilmədən reallaşdırılması dayanır. Bu siyasət Azərbaycanı regional və qlobal proseslərin ən fəal və nüfuzlu aktorlarından birinə çevrilməsinə zəmin yaradıb, ərazi bütövlüyümüzün təmin olunmasında müstəsna rol oynayıb, müttəfiqlərini və tərəfdaşlarını öz strateji maraqlarına uyğun bir şəkildə seçməsinə və seçimində uğur qazanmasına imkan yaradıb. Azərbaycan Avropa İttifaqına üzv olan doqquz dövlət ilə strateji tərəfdaşlıq sazişi və bəyannaməsi imzalayıb və bu, Aİ-yə üzv dövlətlərin üçdə birini təşkil edir. Bu çox ciddi, Avropa İttifaqının siyasətinə təsir göstərə biləcək bir göstəricidir.
Azərbaycan və Avropa İttifaqının ikitərəfli, bərabərhüquqlu saziş üzərində uzun müddətdir ki, iş apardıqlarını bildirən siyasi ekspert deyib: “Hər bir istiqamət, hər bir məqam ən incə nüanslarına kimi müzakirə olunur, milli maraqlarımızın süzgəcindən keçirilir.
Biz daha öncə də qeyd etdiyim kimi, “kütləvi səhnələr”də, təlimatlardan, buyruqlardan ibarət assosiativ sazişlərdə yer almırıq, bərabərhüquqlu strateji tərəfdaş kimi çıxış edir, milli qürurumuzu, vətəndaşlarımızın və dövlətimizin ləyaqətini qoruyur, milli dövlətçilik ənənələrimizi, dəyərlərimizi dövlət siyasətimizin bütün istiqamətlərinə daşımağı bacarırıq”.
E.Mirzəbəylinin sözlərinə görə, uzun illərdir ki, Avropa İttifaqına, NATO-ya üzv olacaqlarını elan edən və bu istiqamətlərdə saysız-hesabsız vədlər alan bir sıra postsovet ölkələrinin mövcud durumu müqayisə üçün kifayət qədər geniş imkanlar yaradır. Dövlətimizin başçısının qeyd etdiyi kimi, Ukraynaya və Gürcüstana NATO üzvlüyünü 15 il öncə vəd edib. Amma sözügedən ölkələr hələ də olduqları yerdədirlər və qarşılaşdıqları çoxsaylı problemlər də göz önündədir. Azərbaycan isə dövlətimizin başçısının vurğuladığı kimi, əməli nəticələrə çevrilməyən bəyanatlardansa, həmişə praktiki addımlar yolunu seçdi, yəni, sözə deyil, əmələ önəm verdi və uğur qazanmağı, qalib gəlməyi bacardı.
Bölmənin digər xəbərləri
