Prezidentin Naxçıvan səfəri: Yüksək diqqətin və strateji baxışın təzahürü
Bakı, 13 avqust, AZƏRTAC
Naxçıvan Muxtar Respublikası əsrlər boyu Azərbaycanın strateji qalası, zəngin mədəniyyət və dövlətçilik ənənələrinin mühüm mərkəzlərindən biri olub. Uzun illər mürəkkəb geostrateji şəraitdə və coğrafi təcrid vəziyyətində yaşamasına baxmayaraq, muxtar respublika öz mərdliyi, möhkəm iradəsi və potensialı ilə ölkəmizin sosial-iqtisadi inkişafında mühüm rol oynayıb. Bu gün Naxçıvan yeni inkişaf mərhələsinə qədəm qoyur. Dövlət tərəfindən həyata keçirilən məqsədyönlü proqramlar, nəhəng infrastruktur layihələri, idarəetmədə müasir yanaşmalar və islahatlar Naxçıvanı nəinki dayanıqlı inkişaf diyarına, həm də regionun mühüm nəqliyyat, logistika və enerji mərkəzinə çevirir. Prezident İlham Əliyevin Naxçıvana növbəti səfəri və Azərbaycan Televiziyasına verdiyi müsahibədə səsləndirdiyi fikirlər bu inkişaf mərhələsinin konturlarını, gələcək hədəfləri və strateji baxışı nümayiş etdirir.
Bu fikirləri AZƏRTAC-a açıqlamasında Milli Məclisin deputatı Kamran Bayramov səsləndirib.
K.Bayramov qeyd edib ki, Naxçıvanın spesifik coğrafi mövqeyi və Azərbaycanın əsas hissəsi ilə birbaşa quru əlaqəsinin olmaması buranın müdafiə potensialının artırılmasını prioritetə çevirir. Əlahiddə Ümumqoşun Ordunun ən müasir texnika ilə təchiz edilməsi və yeni Komando qüvvələrinin yaradılması muxtar respublikanın təhlükəsizliyinin zəmanətidir. Bu diyardan keçəcək Zəngəzur dəhlizi Naxçıvanı təkcə Azərbaycanın əsas hissəsi ilə birləşdirən yol deyil, həm də Avrasiya nəqliyyat şəbəkəsinin mühüm halqasıdır. Vaşinqton Zirvə Görüşündə verilən qərarlar və TRIPP layihəsi çərçivəsində atılan addımlar dəhlizin qısa zamanda istifadəyə veriləcəyini göstərir.
“Naxçıvanın bərpaolunan enerji imkanlarının səmərəli istifadəsi və onun regional enerjisistemlərinə qoşulması strateji əhəmiyyətə malikdir. Belə ki, bu bölgə artıq yalnız özünün elektrik tələbatını qarşılayan ərazi deyil, mühüm enerji ixracatçısına çevrilə biləcək regiondur. Dövlətimizin başçısının qeyd etdiyi kimi, muxtar respublikada Günəş enerjisi hesabına elektrik istehsalının həcmi ilkin mərhələdə 500 meqavatdan çox, potensial olaraq isə 1000 meqavata qədər çata bilər. Bu baxımdan əsas diqqət istehsal olunacaq enerjinin xarici bazarlara çıxarılması imkanlarına yönəlməlidir. İxrac məsələsinin həlli üçün müvafiq ölkələrin aidiyyəti qurumları ilə danışıqlar aparılır. Bununla yanaşı, mövcud elektrik ötürücü infrastrukturunun gücləndirilməsi zəruridir. Uzunmüddətli perspektivdə isə Naxçıvanda istehsal olunan yaşıl enerjinin Avropa bazarlarına çıxarılması əsas məqsədlərdən biridir”, - deyə parlamentari əlavə edib.
Deputat vurğulayıb ki, dövlətimizin başçısının tapşırığı ilə Naxçıvan, Qarabağ və Şərqi Zəngəzur vahid konsepsiya əsasında inkişaf etdirilir. Qarabağda özünü doğruldan Prezidentin Xüsusi Nümayəndəliyi institutunun Naxçıvanda tətbiqi, şəhərin yeni Baş planının hazırlanması və Sənaye Parkının yaradılması bu yanaşmanın nümunələridir. Paralel olaraq sosial obyektlərin, nəqliyyat sisteminin, suvarma şəbəkəsinin yenilənməsi əhalinin həyat keyfiyyətini yaxşılaşdıracaq. Bu səfər, ilk növbədə, dövlətimizin başçısının Naxçıvana göstərdiyi xüsusi diqqətin, həmçinin milli həmrəyliyin nümayişidir. Prezident İlham Əliyevin birbaşa nəzarəti ilə həyata keçirilən infrastruktur və enerji layihələri regionu yeni inkişaf mərhələsinə çıxarır. Eyni zamanda, Naxçıvanın Türkiyə ilə birbaşa sərhədə malik olması bölgəni Türk dünyasının inteqrasiyasında mühüm strateji körpü roluna çevirir.
“Ümumilikdə Prezident İlham Əliyevin Naxçıvana səfəri muxtar respublikanın təhlükəsizlik, “yaşıl enerji” və qlobal logistika sahələrində yeni dövrə qədəm qoyduğunu göstərir. Bütün bu kompleks tədbirlər Naxçıvanın daxili potensialını maksimuma çatdırmaqla yanaşı, bölgəni Azərbaycanın gələcək nəqliyyat, enerji və ticarət xəritəsində aparıcı qovşaqlardan birinə çevirəcək”, - deyə K.Bayramov fikrini yekunlaşdırıb.
Bölmənin digər xəbərləri
