ELM VƏ TƏHSİL
Professor: Vətəndaşlar səsvermə prosesində fəal iştirak edirlər
![Professor: Vətəndaşlar səsvermə prosesində fəal iştirak edirlər](/files/2024/1/1200x630/17073144004631523615_1200x630.jpg)
Bakı, 7 fevral, AZƏRTAC
Azərbaycanın müasir tarixində ilk dəfə ölkənin bütün ərazisində səsvermə keçirilir. Bu gün xalqımız üçün bayramdır. Vətəndaşlar səsvermə prosesində fəal iştirak edirlər. Xalqımız ən layiqli namizədə səs verir.
Bu fikirləri AZƏRTAC-a müsahibəsində Azərbaycan Dövlət İqtisad Universitetinin professoru Arif Şəkərəliyev söyləyib.
Professor vurğulayıb ki, Azərbaycanda aparılan siyasi, iqtisadi və sosial islahatlar cəmiyyətin bütün fəaliyyət sahələrini əhatə edərək ölkəni yeni inkişaf mərhələsinə çıxarıb. Son 20 ildə respublikamızda iqtisadi quruculuq prosesi sürətlənib. Ölkəmiz regionun ən güclü dövlətinə çevrilib. Bunun nəticəsi olaraq insanların rifahı və həyat səviyyəsi xeyli yaxşılaşıb. Çoxsaylı infrastruktur layihələrinin həyata keçirilməsi Azərbaycanın iqtisadi mənzərəsini daha da zənginləşdirib. Respublikamızın sosial-iqtisadi inkişaf sahəsində əldə etdiyi uğurların davamlılığını təmin etmək məqsədilə “Azərbaycan 2030: sosial-iqtisadi inkişafa dair Milli Prioritetlər” qəbul edilib. Bütün bunlar yaxın gələcəkdə Azərbaycan dövlətinin qüdrətini daha da artıracaq.