“QAFQAZDA SÜLH NAMİNƏ ƏMƏKDAŞLIQ” KONFRANSI BAŞA ÇATMIŞDIR
Tbilisidə Gürcüstan dövlətinin himayəsi ilə keçirilən “Qafqazda sülh naminə əməkdaşlıq” mövzusunda beynəlxalq konfrans sonuncu iş günü -iyulun 19-da gündəlikdəki məsələlərin müzakirəsini davam etdirmişdir.
Din xadimləri, ilahiyyatçı alimlər Qafqazda illərdən bəri davam edən milli münaqişələrin həlli yolları barədə öz təkliflərini verdilər. Yekdil rəyə görə, Qafqazın bütün sahələrdə inkişafına, region xalqlarının rifahını yaxşılaşdırmağa böyük əngəl törədən milli münaqişələrin, nəhayət, aradan qaldırılması üçün qarşılıqlı güzəşt və etimad mühiti yaratmaq, qarşılıqlı ədavət və düşmənçiliyə son qoyulması yollarını dövlət başçılarının, din xadimlərinin, icimai təşkilatların və qeyri-hökumət təşkilatlarının birgə səyləri ilə axtarmaq lazımdır. Əks halda, Qağqaz kimi gözəl və nadir məkan daha ağır fəlakətə düçar olacaqdır.
Konfransın sonunda iştirakçılar rəsmi məlumat və Qafqaz xalqlarına və hökumətlərinə müraciət qəbul etdilər. Sənədlərdə belə bir inam ifadə edilir ki, beynəlxalq səviyyədə keçirilmiş bu sülh amallı görüş Qafqazın ölkələri və xalqları arasında dostluq və qarşılıqlı həmrəylik ab-havasının bərqərar olmasına kömək edəcəkdir. Konfrans iştirakçıları bəyan etmişlər ki, biz - Qafqaz regionunun dini liderləri, eləcə də siyasətçiləri, elm və mədəniyyət xadimləri üzərimizə düşən yüksək məsuliyyəti dərk edərək, həmvətənlərimizin süuruna və qəlbinə nəcib hisslər aşılamağı, onları hər bir xalqın və bütün Qafqazın rifahına uyğun olan dinc yanaşı yaşamaq yoluna yönəltməyi özümüzə borc bilirik. Millətlərarası və dinlərarası qarşılıqlı fəaliyyət, mehriban qonşuluq, ərazi bütövlüyünün qorunub saxlanması, münaqişələrin danışıqlar yolu ilə nizama salınması Qafqazın xoşbəxt gələcəyi üçün yeganə yoldur.
Konfrans başa çatdıqdan sonra Gürcüstan dövləti adından iştirakçıların şərəfinə ziyafət verildi.
X X X
İyulun 18-də Gürcüstan parlamentinin sədri Nino Burcanadze Qafqaz Müsəlmanları İdarəsinin sədri şexülislam hacı Allahşükür Paşazadəni qəbul etmişdir.
Xanım Burcanadze Tbilisiyə, din xadimlərinin mötəbər məclisinə təşrif gətirdiyinə görə şeyxülislama təşəkkürünü bildirərək dedi ki, Gürcüstan və Azərbaycan nəinki dost ölkələr, həm də strateji tərəfdaşlardır. Ölkələrimizin dövlət müstəqilliyi bərpa olunduqdaun sonra əlaqələrimiz daim genişlərir və bu, xalqlarımızın rifahının yüksəlməsinə, suverenliyimizin möhkəmlənməsinə xidmət edir. Nino Burcanadze Bakıya səfərini və Prezident Heydər Əliyev ilə görüşünü minnətdarlıq hissi ilə xatırladı.
Hacı Allahşükür Paşazadə Gürcüstandakı soydaşlarımızın öz dininə azad və sərbəst etiqad etməsinə, məscidlər açılmasına imkan yaradıldığına görə ölkə rəhbərliyinə dərin təşəkkürünü bildirdi. O dedi ki, xalqlarımızın dücar olduqları uydurma milli münaqişələrin aradan qaldırılması üçün onların din xadimləri də səylərini əsirgəmirlər. Şeyxülislam bütün Gürcüstanın müqəddəs və məsud katolikosu II İliya ilə bu istiqamətdə birgə çalışdıqlarını da vurğuladı. Dini idarənin başçısı Gürcüstan parlamentinin sədrinə Qurani-Kərimin 10 nüsxəsini və köhnə Bakının təsvir olunduğu rəsm əsərini hədiyyə etdi.
X X X
İyulun 19-da Qafqaz Müsəlmanları İdarəsinin sədri şeyxülislam hacı Allahşükür Paşazadə və onunla birlikdə Tbilisiyə gələn nümayəndə heyətinin üzvləri, Azərbaycanın Gürcüstandakı səfiri Hacan Hacıyev və Kvemo Kartli - Borçalı bölgəsinin qubernatoru Levan Mamaladze Marneuli rayonundakı Kosalı kəndində məscid və mədrəsənin təntənəli açılış mərasimində iştirak etdilər.
Şeyxülislam mərasimdə çıxış edərək, qardaş ölkədəki müsəlmanlara qayğı və diqqətə görə Gürcüstan və bölgə rəhbərliyinə minnətdarlığını bildirdi, soydaşlarımızı dost dövlətin layiqli vətəndaşları olmağa və onun müstəqilliyinin möhkəmlənməsi naminə qüvvə və səylərini əsirgəməməyə çağırdı.
Mərasimdə çıxış edənlər ölkələrimizdə dini azadlıq üçün geniş imkanlar yaradılmasına görə prezidentlər Heydər Əliyevə və Eduard Şevardnadzeyə təşəkkürlərini çatdırmağı xahiş etdilər.
Şahismayıl Məmmədov
AZƏRTAC-ın xüsusi müxbiri
Tbilisi-Marneuli
Bölmənin digər xəbərləri
