Qafqazın sonuncu kolxozu – İvanovka VİDEO
İsmayıllı, 2 iyul, AZƏRTAC
AZƏRTAC-ın “Mən turist olsaydım” rubrikası: İvanovka kəndi.
İsmayıllı rayonuna səfər edən hər kəsin yolüstü mütləq baş çəkdiyi məkanlardan biri də İvanovka kəndidir. Azərbaycanın ən məşhur kəndlərindən hesab olunan bu yaşayış məntəqəsi təkcə zəngin tarixi ilə deyil, həm də özünəməxsus memarlığı, qorunub saxlanılan mədəni irsi və təbiəti ilə seçilir. Son illər İsmayıllının digər turistik kəndləri ilə yanaşı, İvanovkaya da marağın artması təsadüfi deyil.
İvanovka həm tarix, həm kənd turizmi, həm də Azərbaycanın multikultural mühitini yaxından görmək üçün ən maraqlı ünvanlardan biridir. Kənd dəniz səviyyəsindən 800-850 metr yüksəklikdə, rayon mərkəzindən cəmi 12 kilometr məsafədə yerləşir. Kəndə aparan yol boyunca uzanan yaşıllıqlar, geniş əkin sahələri və səliqəli yaşayış məntəqələri hələ İvanovkaya çatmamış qonaqlarda xoş təəssürat yaradır. İvanovkanın tarixi iki əsrdən əvvələ gedib çıxır. Bu kənd Azərbaycanın ən qədim rus yaşayış məntəqələrindən biri hesab olunur. Kəndin əvvəlki adı Həftəran olub. Sonradan əraziyə köçürülənlərin məskunlaşmasına rəhbərlik edən İvan Perşin şərəfinə yaşayış məntəqəsi İvanovka adlandırılıb.
Kəndin ümumi görünüşü sanki qonaqları keçmişə aparır. Müasir tikililər olsa da, yaşayış məntəqəsinin özünəməxsus siması qorunur.
İvanovka uzun illər kənd təsərrüfatı ilə şöhrət qazanıb. Hələ sovet dövründə burada yaradılan kolxoz ölkənin ən qabaqcıl təsərrüfatlarından olub. Müstəqillik illərində də “Qafqazın sonuncu kolxozu” kimi tanınıb. Geniş əkin sahələri, südçülük və heyvandarlıq fermaları, istehsal müəssisələri kənd iqtisadiyyatının əsas dayaqlarını təşkil edir. Burada bişirilən məşhur “Molokan çörəyi”, süd məhsulları, pendir, xama və günəbaxan yağı uzun illərdir ölkənin müxtəlif bölgələrində də məşhurdur.
Kəndin mərkəzində yerləşən süni göl və ətrafındakı park istirahət üçün ən çox seçilən məkanlardandır.
İvanovkanın daha bir üstünlüyü burada müxtəlif xalqların nümayəndələrinin mehriban və qarşılıqlı hörmət şəraitində yaşamasıdır. Hazırda kənddə molokanlarla yanaşı, azərbaycanlılar və ləzgilər də yaşayırlar. Bu müxtəliflik kəndin sosial həyatında və gündəlik münasibətlərində özünü açıq şəkildə göstərir.
Son illər İvanovkanın turizm potensialı daha da artıb. Təmiz hava, zəngin tarix, fərqli memarlıq, kənd həyatının səmimiliyi və qonaqpərvərlik İvanovkanı Azərbaycanın ən maraqlı turizm məkanlarından birinə çevirir. Bu kənd Azərbaycanın keçmişi ilə bu gününü birləşdirən, özünəməxsus ruhunu qoruyub saxlayan nadir məkanlardan biridir.
Müxbir - Rəşad Türkoğlu
Bölmənin digər xəbərləri
