Qanlı Yanvar – hüzn və qürur günü
Kürdəmir, 18 yanvar (AZƏRTAC). Kürdəmir rayon Mərkəzi Kitabxanasında “20 Yanvar - hüzn və qürur günü” mövzusunda tədbir keçirilmişdir. AZƏRTAC xəbər verir ki, tədbir iştirakçıları əvvəlcə 20 Yanvar faciəsinin 24-cü ildönümünə həsr edilmiş kitab sərgisinə baxmışlar.
Tədbirdə çıxış edənlər 1990-cı il yanvarın 19-dan 20-nə keçən gecə sovet qoşun birləşmələrinin Bakıya təcavüzü, ölkəmizin ərazi bütövlüyünün pozulmasına qarşı etiraz səsini ucaldan dinc əhaliyə divan tutması, kütləvi terror nəticəsində uşaq və qadınların, qocaların qətlə yetirilməsi barədə ürək ağrısı ilə danışmışlar. 20 Yanvarın Azərbaycan xalqının azadlıq uğrunda mübarizə tarixinə faciə ilə bərabər, həm də qürur günü kimi daxil olduğunu qeyd edən natiqlər ulu öndər Heydər Əliyevin bu hadisələrdən dərhal sonra bütün maneə və təhlükələrə baxmayaraq Moskvada keçirdiyi mətbuat konfransını, orada səsləndirdiyi tarixi bəyanatı xatırlatmışlar.
Tədbirin sonunda 20 Yanvar faciəsinə həsr edilən ədəbi-bədii kompozisiya nümayiş olunmuşdur.
Bölmənin digər xəbərləri
