“Qantas Airways” aviaşirkəti bütün əməkdaşlarından vaksinasiya olunmalarını tələb edir
Tokio, 18 avqust, AZƏRTAC
Avstraliyanın “Qantas Airways” şirkəti ümumi sayı 22 minə çatan bütün əməkdaşlarından koronavirusa qarşı vaksinasiya olunmalarını tələb edir.
AZƏRTAC xəbər verir ki, bu barədə aviaşirkətin rəhbərliyi avqustun 18-də deyib. Bildirilir ki, rəhbərliyin tələbinə əsasən, şirkətin pilotları, göyərtə bələdçiləri və aeroportun işçiləri noyabrın 15-dək, digər əməkdaşlar isə martın 31-dək vaksinasiya olunmalıdırlar. Bu zaman yalnız tibbi səbəblərə görə vaksin vurdura bilməyənlərə güzəşt ediləcək.
Şirkətin icraçı direktoru Alan Coysun bəyanatında deyilir: “Vaksinasiyanın sərhədlərin bağlanmasının qarşısını almaq üçün yeganə vasitə olduğu hamıya məlumdur. Şirkətimizin əməkdaşlarının əksəriyyəti üçün isə bu, yenidən işə qayıtmaq deməkdir”.
Qeyd edək ki, aviaşirkət bu ərəfədə Avstraliya sərhədlərinin açılması üçün bütün sərnişinlərin vaksinasiya olunmasının tələb edilməsi barədə təklif də irəli sürüb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
