QARA DƏNİZİN GÜRCÜSTAN AKVATORİYASINI ÇİRKLƏNDİRƏN TÜRKİYƏ GƏMİSİ TUTULMUŞDUR
AZƏRTAC-ın xüsusi müxbiri xəbər verir ki, Gürcüstan Qara dəniz Konvensiyası Müfəttişliyinin rəisi vəzifəsini icra edən Anna Şotadze Qara dənizin Gürcüstan akvatoriyasını çirkləndirdiyinə görə Türkiyə yük gəmisinin 65 min lari (1 dollar 1,73 laridir) ödəməli olacağını bildirmişdir. A.Şotadze demişdir: “Gəmi Batumi limanının 9-cu dayanacağında suya tünd rəngli yağlı maddə axıtmışdır. Həmin faktı dəniz polisi qeydə almışdır. Gəmidən limanın akvatoriyasına axıdılmış maddədən nümunə götürmüşük. Onun laboratoriya analizindən suyun konkret olaraq hansı maddə ilə çirkləndirildiyi və bununla ətraf mühitə nə qədər zərər vurulduğu müəyyənləşdirilmişdir”.
Dəniz polisi ilə konvensiya müfəttişliyi birgə inzibati hüquq pozuntusu protokolu tərtib etmişdir. Həmin protokola əsasən gəminin sahibi 65 min lari cərimə verməlidir. Gəmi hazırda Batumi limanında dayandırılmışdır və o, cəriməni ödədikdən sonra buraxılacaqdır.
Bölmənin digər xəbərləri
