Qazaxda “Varislik ənənəsinin uğurlu davamı - əbədi müstəqillik” adlı tədbir keçirilib
Qazax, 27 may, Ruslan Novruzoğlu, AZƏRTAC
Qazax Rayon Heydər Əliyev Mərkəzi və Qazax şəhər Mehdi Hüseyn adına Humanitar və Təbiət Fənləri Təmayüllü Məktəb-Liseyin birgə təşkilatçılığı ilə 28 May - Müstəqillik Günü ilə əlaqədar “Varislik ənənəsinin uğurlu davamı - əbədi müstəqillik” adlı tədbir keçirilib.
AZƏRTAC-ın bölgə müxbiri xəbər verir ki, tədbirdə “Qalib ölkənin müstəqilliyi” filmi nümayiş etdirilib.
Qazax Rayon Heydər Əliyev Mərkəzinin direktoru Ceyhunə Hüseynova Azərbaycan Xalq Cümhuriyyətinin yaranma tarixindən, müstəqilliyimizin keçdiyi tarixi inkişaf yolundan danışıb. Bildirib ki, Azərbaycan xalqı Şərqdə ilk dünyəvi və parlamentli respublika yaradaraq öz dövlətçiliyini qurub. Ümummilli Lider Heydər Əliyevin dediyi kimi: “28 May günü Azərbaycan xalqı üçün əziz gündür. Çünki 1918-ci ildə məhz 28 Mayda Azərbaycanın qabaqcıl insanları Azərbaycanın müstəqilliyi haqqında istiqlal bəyannaməsini qəbul ediblər və ondan sonra da Azərbaycan Xalq Cümhuriyyəti qurulubdur”. Xalq Cümhuriyyətinin ömrü qısa olsa da, bu müddət ərzində böyük işlər görə bilib.
Çıxışlarda müstəqilliyin bərpa edilməsindən, onun qorunub saxlanılmasından və möhkəmləndirilməsindən də danışılıb. Bildirilib ki, Heydər Əliyevin yenidən hakimiyyətə qayıdışı ilə Azərbaycan inkişaf yoluna qədəm qoydu, sabitlik təmin edildi. 1993-cü ilə qədər formal xarakter daşıyan müstəqilliyimiz Ulu Öndər Heydər Əliyevin misilsiz xidmətləri sayəsində əbədi oldu, Azərbaycan əsl müstəqillik yoluna qədəm qoydu. Həm siyasi, həm iqtisadi, həm də digər sahələrdə çox ciddi islahatlara başlanıldı. Nizami ordu yaradıldı, ölkəmizə böyük həcmdə xarici sərmayə cəlb olundu, Azərbaycanın strateji inkişaf istiqamətləri müəyyən edildi. Bu gün Azərbaycan bu strateji inkişaf istiqamətlərini əsas tutaraq öz inamlı siyasətini aparır. Ölkəmiz müstəqil siyasət apararaq, milli maraqların təmin olunmasında çox böyük addımlar atır, uğurlar qazanır. Diqqətə çatdırılıb ki, Prezident İlham Əliyevin rəhbərliyi ilə Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir, ölkə iqtisadiyyatı inkişaf etdirilir, əhalinin sosial müdafiəsinin gücləndirilməsi üçün əsaslı tədbirlər görülür. Azərbaycan torpaqlarını işğaldan qurtarıb, suverenliyini bərpa edib. İndi azad olunan torpaqlarda genişmiqyaslı tikinti-quruculuq işləri aparılır, insanlar doğma yurdlarına qayıdırlar.
Qazax şəhər Mehdi Hüseyn adına Humanitar və Təbiət Fənləri Təmayüllü Məktəb-Liseyin şagirdləri Müstəqillik Gününə həsr edilmiş şeir səsləndirib, ədəbi kompozisiyalar nümayiş etdiriblər.
Bölmənin digər xəbərləri
