Qazaxıstan Suriya ilə bağlı Astana formatında danışıqlar aparmağa hazırdır
Nur-Sultan, 16 noyabr, AZƏRTAC
Qazaxıstan Suriya ilə bağlı Astana formatında danışıqlar aparmağa hazırdır.
AZƏRTAC xəbər verir ki, ölkənin xarici işlər naziri Muxtar Tleuberdi hazırda Astana prosesinin qarantı olan ölkələrin XİN rəhbərlərinin görüşünün razılaşdırıldığını bildirib.
Qeyd edib ki, dəqiq tarix hələ ki, müəyyənləşdirilməyib, lakin görüşün dekabrın ikinci yarısında keçiriləcəyi gözlənilir.
“Biz dekabrın 20-də görüşü qəbul etməyə və keçirməyə hazır olduğumuzu təsdiqlədik. Rusiya tərəfindən rəsmi nota almışıq. İndi digər tərəflərin təsdiqini gözləyirik”, - deyə Qazaxıstan XİN başçısı bildirib.
Xatırladaq ki, Suriya ilə bağlı danışıqların sonuncu - 16-cı raundu Qazaxıstan paytaxtında bu il iyulun 7-8-də keçirilib. Danışıqlarda qarant ölkələrin (İran, Rusiya və Türkiyə), Suriya hökuməti, silahlı Suriya müxalifəti, həmçinin BMT, İordaniya, Livan və İraqdan olan müşahidəçilər iştirak ediblər.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
