Qaziantep şəhəri “Avropa Mükafatı-2025”in qalibi elan olunub
Qaziantep, 11 oktyabr, AZƏRTAC
Türkiyənin Qaziantep şəhəri Avropa Şurası Parlament Assambleyasının (AŞPA) təsis etdiyi “Avropa Mükafatı-2025”in qalibi elan olunub.
AZƏRTAC xəbər verir ki, mükafatın təqdim edilməsinə həsr olunmuş mətbuat konfransında Türkiyə hökumətinin nümayəndələri, millət vəkilləri, Qaziantep bələdiyyəsinin sədri Fatma Şahin, AŞPA nümayəndələri iştirak ediblər.
F.Şahin “Avropa Mükafatı-2025”i “Avropa Şurasının ciddi tələblərinə uyğun olması istiqamətində şəhər sakinləri və rəhbərliyinin birgə səylərinin layiqli nəticəsi” adlandırıb.
O xatırladıb ki, “Avropa Mükafatı” 1955-ci ildə təsis edilib, bu il isə mübarizə Qaziantep, Almaniyanın Auqsburq və Münster, Litvanın Birştonas, Polşanın Plonsk və Ukraynanın Vinnitsa şəhərləri arasında keçib. Vinnitsa və Qaziantep finala yüksəlib.
“AŞPA-da açıq səs çoxluğu ilə Qaziantepin yerli idarəetmə modelinin lehinə aydın seçim edildi”, - deyən bələdiyyə rəhbəri Türkiyə şəhərinin seçilməsində mühüm amilin ətraf mühitin mühafizəsi tədbirləri, o cümlədən tullantılardan elektrik enerjisinin aktiv istehsalı olduğunu qeyd edib.
Türkiyə Böyük Millət Məclisinin Xarici Əlaqələr Komitəsinin sədri Fuat Oktay da AŞPA-nın qərarının məqsədəuyğunluğunu bildirib. O, Qaziantepi “mədəniyyətlər mozaikası” və “sülh platforması” adlandırıb.
Hakim Ədalət və İnkişaf Partiyasının parlamentdəki fraksiyasının sədr müavini Əbdülhəmit Gül son 13 ildə yüz minlərlə suriyalı qaçqının Qaziantepdə yaşaması faktına diqqət çəkib. “Bütün çətinliklərə baxmayaraq, biz humanizm prinsiplərindən geri çəkilməmişik, qapılarımızı suriyalı qardaşlarımızın üzünə açıq saxlayırıq və qaçqınlara yardım etməyə davam edirik”, - deyə o qeyd edib.
Ə.Gül Qaziantepin “NATO-nun cənub cinahının cəbhə xəttində” yerləşməsi faktına də işarə edərək, iki milyondan çox əhalisi olan vilayətin əhəmiyyətini vurğulayıb.
Tədbir çərçivəsində Qaziantepdə Avropa Şurasının dəstəyi ilə həyata keçirilən uğurlu layihə və proqramlara həsr olunmuş fotosərgi də təşkil edilib.
Ramin Abdullayev
AZƏRTAC-ın xüsusi müxbiri
Qaziantep
Bölmənin digər xəbərləri
