“QAZPROM” İRANDAN HİNDİSTANA QAZ KƏMƏRİ ÇƏKMƏYİ TƏKLİF ETMİŞDİR
Rusiyanın “Qazprom” şirkəti İslamabada Pakistanın ərazi sularından keçməklə İrandan Hindistana qaz kəməri çəkməyi təklif etmişdir. Yerli mətbuatın məlumatına görə, Pakistanın Neft və Təbii Ehtiyyatlar Nazirliyi hökumətə sorğu göndərərək, “Qazprom”un təklif etdiyi layihə üzrə müvafiq tədqiqatlar aparılması üçün Rusiya şirkətinə icazə verilməsini xahiş etmişdir.
İslamabad həmin məsələni müsbət həll edərsə, qarşılıqlı anlaşma haqqında memorandum imzalanacaqdır. “Qazprom” təkcə tədqiqat işləri aparılması ilə kifayətlənməyəcək, həm də bu layihənin maliyyələşdirilməsində iştirak etmək niyyətindədir.
İTAR-TASS-ın verdiyi xəbərə görə, hazırda qaz kəməri çəkilməsinə dair daha iki variant öyrənilməkdədir. Avstraliyanın “Bi-Eyç-Pi petroleum” şirkəti qaz kəmərinin Pakistanın quru ərazisi ilə çəkilməsinin mümkünlüyünü araşdırır. Layihənin dəyəri təxminən 3 milyard dollar olacaqdır. İtaliya firmalarından biri isə Ərəbistan dənizinin dibi ilə boru kəməri çəkilməsi variantını öyrənir, lakin bu, çox baha başa gələ bilər. Qaz kəmərinin quruda çəkilməsi daha sərfəli olsa da, bu variant Pakistanla münasibətlərin gərginliyi baxımından Hindistan üçün məqbul deyildir.
Hindistan Rusiyanın təklifinə müsbət yanaşır və bu fikirdədir ki, quru ilə müqayisədə sahil boyunca dənizin dibi ilə çəkilən qaz kəmərinin təhlükəsizliyini təmin etmək Pakistana asan olacaqdır. Çünki quruda inşa olunacaq boru kəməri terrorçuların hücumlarına məruz qala bilər.
Bölmənin digər xəbərləri
