QƏBƏLƏDƏ MƏHSULDAR ARI AİLƏLƏRİNİN SAYI 1.229-A ÇATMIŞDIR
Qəbələ, 20 aprel (AZƏRTAC). Qəbələ rayonunda arıçılıq sürətlə inkişaf etdirilir. Rayon icra hakimiyyətinin aqrar şöbəsindən bildirmişlər ki, dağlıq və düzən əraziləri olan Qəbələdə iqtisadi baxımdan çox sərfəli olan bu sahənin inkişafı üçün gözəl şərait vardır. Arıçılığın daha da inkişaf etdirilməsi, bu sahə ilə məşğul olan sahibkarların işinin əlaqələndirilməsi üçün Azərbaycan Arıçılar Birliyinin Qəbələ rayon şöbəsi yaradılmışdır.
“Arıçılıq haqqında” qanunun tələblərinə uyğun olaraq rayonda görülən səmərəli işlərin nəticəsidir ki, arıçılıq təsərrüfatları və bu sahə ilə məşğul olanların sayı ildən-ilə artır. Son bir ildə rayonda 37 fiziki şəxs fərdi arıçılıq təsərrüfatı yaratmışdır. Hazırda arıçılıqla məşğul olan fiziki şəxslərin sayı 247-yə, arı ailələrinin sayı isə 1.229-a çatmışdır. Peşəkar arıçılar nəinki öz təsərrüfatlarının genişləndirilməsi, habelə daha məhsuldar və yerli şəraitə uyğun cinslər hesabına arı ailələrinin yetişdirilməsi sahəsində mühüm işlər görürlər.
Ötən bir ildə qəbələli arıçılar 15 tona yaxın bal istehsal etmişlər. Rayonun damazlıq təsərrüfatında arı ailələrinin sayının yaxın illərdə 3-4 dəfə artırılması nəzərdə tutulmuşdur. Qəbələnin qabaqcıl arıçılarından olan İlham Vəliyev və Kamran Bayramov Kənd Təsərrüfatı Nazirliyinin fəxri fərmanına layiq görülmüşlər.
Bölmənin digər xəbərləri
