SİYASƏT
Qırğız nəşri ötən 20 il ərzində Azərbaycanın uğurlarından bəhs edib
![Qırğız nəşri ötən 20 il ərzində Azərbaycanın uğurlarından bəhs edib](/files/2023/3/1200x630/16998951366235735207_1200x630.jpg)
Bakı, 13 noyabr, AZƏRTAC
“Veçerniy Bişkek” nəşri 8 Noyabr - Azərbaycanın Zəfər Günü, habelə Prezident İlham Əliyevin Azərbaycana rəhbərliyinin 20 illiyi münasibətilə öz saytında ölkəmizin Qırğızıstandakı səfiri Lətif Qəndilovla müsahibəni dərc edib.
AZƏRTAC xəbər verir ki, diplomat Azərbaycanın Prezident İlham Əliyevin rəhbərliyi ilə ərazilərini işğaldan azad etdiyini, ölkədə sabitliyin hökm sürdüyünü, azərbaycanlıların həmrəylik səviyyəsinin həmişəkindən daha yüksək olduğunu, Azərbaycan iqtisadiyyatının özünü təmin etmək səviyyəsinə yüksəldiyini, bunun isə ölkənin özünəməxsus daxili resursları və səmərəli idarəetmə sayəsində mümkün olduğunu, Azərbaycanın nüfuzlu dünya dövlətləri sırasına qoşulduğunu qeyd edib.
Səfir bildirib ki, Prezident İlham Əliyevə ictimai etimadın reytinqinin daim yüksəlməsi təəccüb doğurmur. “Bunun başlıca səbəbi ondan ibarətdir ki, İlham Əliyev bütün seçkiqabağı vədlərini yerinə yetirib. Genişmiqyaslı regional layihələr həyata keçirilib, dövlət gəlirləri artır, yeni iş yerləri yaradılır, sosial problemlər operativ şəkildə öz həllini tapır. Vətəndaşların rifahı dövlət başçısının əsas prioritetlərindən birinə çevrilib, bu rifah səviyyəsinin dayanıqlı qarantı qismində isə məlum olduğu kimi, yalnız ölkədə arcıdıl olaraq həyata keçirilən iqtisadi islahatların balanslaşdırılması çıxış edə bilər. Son 20 il ərzində əldə edilən uğurlar göz qabağındadır. Ölkə daha da güclənib, dünyada öz layiqli yerini tutub, dövlətimizlə regionda və bölgədə hesablaşırlar. Hazırda Azərbaycan yeni tendensiyalar irəli sürən faktiki və qeyd-şərtsiz lider ölkədir”, - deyə səfir vurğulayıb.
“Azərbaycan nə üçün bütün bu illər ərzində yalnız uğurlara imza atıb? Çünki bizim milli maraqlarımız digər dövlətlərin və dünya ictimaiyyətinin maraqlarına zidd olmayıb və indi də zidd deyil. Mən hətta deyərdim ki, bu, milli praqmatikliyin, ölkənin yüksək səmərəliliklə idarə edilməsinin qlobal dünya siyasəti ilə çox həssas, unikal şəkildə uyğunlaşmasının nəticəsidir. Fikrimcə, Prezident İlham Əliyevin və Ümummilli Liderimiz Heydər Əliyevin siyasətinin nəhəngliyi məhz bu uyğunlaşmanın təmin edilməsi və qorunub saxlanması bacarığındadır. Bəlkə də hər bir ölkənin lideri bu cür fenomenal idarəetmə üslubuna malik olsaydı, dünya daha iri addımlarla irəliləyə bilərdi, lakin bu, yalnız qeyri-adi və dahi şəxsiyyətlərə xas olan nadir xüsusiyyətdir”, - deyə Lətif Qəndilov qeyd edib.
Qarabağdakı cari vəziyyət barədə söz açan səfir bu problemin həll olunduğunu vurğulayıb: “Azərbaycanın daha əvvəl işğal olunmuş bütün ərazilərində hazırda Azərbaycanın Dövlət Bayrağı dalğalanır, bu hər kəs üçün tarixi hadisədir”. Səfir bildirib ki, Azərbaycan heç vaxt Xankəndi sakinlərinə ölkənin ərazisini tərk etmələri barədə heç nə deməyib. Əksinə, Bakı dəfələrlə bunu etməyəcəyi ilə bağlı bəyanatlar verib.
“Getmək qərarı onların öz seçimi olub. Azərbaycan elə indi də orada 1991-ci ilə qədər yaşayanları, hətta onların nəsillərini geri qəbul etməyə hazırdır. Gəlsinlər və yaşasınlar, biz onların təhlükəsizliyinə tam zəmanət veririk. Biz azərbaycanlılar üçün tolerantlıq bizim həyat tərzimizdir”, - deyən diplomat əlavə edib ki, öz törətdikləri əməllərə görə cavab verməli olan hərbi cinayətkarları heç vaxt bağışlamaq mümkün deyil. Heç bir cinayət cəzasız qalmamalıdır, əks halda, belə mənfur əməllər yenidən təkrarlana bilər.
Səfir qeyd edib ki, əgər Ermənistanla sülh müqaviləsi imzalanarsa, Azərbaycan bu dövlətlə iqtisadi əlaqələri bərpa etməyə hazırdır, bu iqtisadi əməkdaşlıq və yüklərin daşınması Ermənistana yalnız faydalı ola bilər. Əgər Ermənistan tərəfi bu təmasların yaradılmasına razı olmazsa, Azərbaycanın artıq İran ərazisindən keçməklə Naxçıvan istiqamətinə avtomobil yolunun açılması ilə bağlı İranla anlaşması mövcuddur.