QIRĞIZISTAN PARLAMENTİNİN SƏDRİ AZƏRBAYCAN MİLLİ MƏCLİSİNİN DEPUTATI İLƏ GÖRÜŞMÜŞDÜR
AZƏRTAC-ın xüsusi müxbiri xəbər verir ki, Azərbaycan Milli Məclisinin deputatı, parlamentlərarası beynəlxalq əlaqələr komissiyasının üzvü Sabir Rüstəmxanlı Qırğızıstanda rəsmi səfərdə olmuşdur. Sabir Rüstəmxanlının Qırğızıstan parlamentinin sədri Abduqəni Erkibayevlə görüşündə türkdilli respublikaların parlamentləri arasında sıx əlaqələrin yaradılması, qəbul edilən qanunlarla bağlı informasiya mübadiləsinin aparılması, dostluq münasibətlərinin daha da inkişaf etdirilməsi məsələləri müzakirə edilmiş, Türkdilli Ölkələrin Parlament Assambleyasının yaradılması ideyası ətrafında fikir mübadiləsi aparılmışdır.
S.Rüstəmxanlı Ermənistan-Azərbaycan, Dağlıq Qarabağ münaqişəsi haqqında parlament sədrinə ətraflı məlumat vermişdir. O, Azərbaycan Milli Məclisinin sədri Murtuz Ələsgərovun Azərbaycana dəvət məktubunu Abduqəni Erkibayevə təqdim etmişdir. Dəvət məmnunluqla qəbul olunmuşdur.
Deputat Bişkekdəki “Azəri” mədəniyyət mərkəzinin sədri Akif Allahverdiyev və diasporumuzun üzvləri ilə də görüşmüş, soydaşlarımıza Dağlıq Qarabağa dair kitablar bağışlamışdır.
Bölmənin digər xəbərləri
