QIRICI TƏYYARƏ TAMAŞAÇILARIN ÜSTÜNƏ DÜŞMÜŞDÜR
İyulun 27-də Lvovda aviaşou keçirilərkən Su-27 qırıcı təyyarəsi qəzaya uğramışdır. “İnterfaks” agentliyinin verdiyi xəbərə görə, pilotlar katapult vasitəsilə xilas olsalar da, təyyarə tamaşaçıların toplaşdığı yerə düşmüşdür.
Ukrayna Fövqəladə Hallar Nazirliyinin ilkin məlumatına görə, qəza nəticəsində 66 nəfər həlak olmuş, 80-dən çox adam yaralanmışdır.
Aviaşou Ukrayna Hərbi Hava Qüvvələrinin 14-cü aviasiya korpusunun 60 illiyi münasibətilə “Skniliv” aerodromunda keçirilirdi. Aviasiya bayramında Su-27 və MiQ-29 qırıcı təyyarələri yüksək pilotaj nümunələri nümayiş etdirirdi. Manevr zamanı Su-27 dayanacaqdakı təyyarəyə ilişmiş və istiqamətini kəskin surətdə dəyişərək meydançaya düşmüşdür. Hərbçilərin fikrincə, qəzanın ən çox ehtimal edilən səbəbi təyyarə alçaqdan uçarkən mühərriklərin xarab olmasıdır.
Ukrayna Müdafiə Nazirliyi qəzanın səbəblərini və şəraitini araşdırmaq üçün komissiya yaratmışdır. Ona müdafiə idarəsi başçısının vəzifəsini icra edən Pyotr Şulyak rəhbərlik edir.
Ukrayna Prezidenti Leonid Kuçma Krımda istirahətini dayandıraraq Lvova getmişdir.
Azərbayan Prezidenti Heydər Əliyev təyyarə qəzası ilə əlaqədar Ukrayna Prezidentinə başsağlığı göndərmişdir.
Bölmənin digər xəbərləri
