QIŞ QAÇQINLAR VƏ MƏCBURİ KÖÇKÜNLƏR ÜÇÜN CİDDİ PROBLEMLƏR YARADA BİLMƏYİB
Qaçqınların və Məcburi Köçkünlərin İşləri üzrə Dövlət Komitəsinin beynəlxalq əlaqələr, informasiya və mətbuat departamentindən AZƏRTAC-ın müxbirinə bildirmişlər ki, qışa vaxtında hazırlıq görüldüyü üçün havaların kəskin soyuması, güclü qar yağması qaçqınların və məcburi köçkünlərin yığcam məskunlaşdıqları ərazilərdə elə bir ciddi problem yaratmayıbdır.
Oktyabr ayından başlayaraq hər qaçqın və məcburi köçkün ailəsinə ayda 30 litr, hamam təsərrüfatı üçün 500 litr, məktəblərdə hər bir sinif otağına 26 litr, uşaq bağçaları və tibb məntəqələrinə 100 litr soba yanacağı verilir.
Havalar sərtləşəndən isə komitədə fövqəladə iş rejiminə keçilib, burada mərkəzi qərargah fəaliyyət göstərir. Qaçqın və məcburi köçkünlərin yığcam məskunlaşdıqları rayonlarda yaradılmış analoji qurumlar baş verən hər bir hadisə ilə bağlı mərkəzi qərargaha dərhal məlumat çatdırırlar. Həmin məlumatlara əsasən operativ tədbirlər görülür. Bundan əlavə, komitənin məsul işçiləri vəziyyətə nəzarət etməkdən ötrü yerlərə ezam olunublar. Elektrik enerjisi ilə təminat diqqət mərkəzində saxlanılır. Hələ ilin əvvəlində 15 ədəd yeni transformator, 8 su nasosu, 15 min metr kabel, 150 min metr naqil və digər yardımçı materiallar alınaraq yerlərə göndərilmişdir.
Bölmənin digər xəbərləri
