Qobustan şəhərinin içməli su təchizatı və kanalizasiya sistemlərinin yenidən qurulması layihəsinə başlanılıb
Bakı, 12 may, AZƏRTAC
Azərbaycan Respublikası hökuməti ilə Yaponiya Beynəlxalq Əməkdaşlıq Agentliyinin birgə maliyyələşdirdiyi “Kiçik şəhərlərdə su təchizatı və kanalizasiya layihəsi” çərçivəsində “Qobustan şəhərinin içməli su təchizatı və kanalizasiya sistemlərinin yenidən qurulması layihəsi”nin icrasına başlanılıb.
“Azərsu” Açıq Səhmdar Cəmiyyətinin mətbuat xidmətindən AZƏRTAC-a verilən məlumata görə, bu münasibətlə Qobustan şəhərində təməlqoyma mərasimi keçirilib.
Mərasimdə çıxış edən “Azərsu” ASC-nin sədri Qorxmaz Hüseynov bildirib ki, Qobustan şəhərində bu sahədə görülən işlər böyük dövlət xadimi, ulu öndər Heydər Əliyevin anadan olmasının 92-ci ildönümünə təsadüf edir.
Vurğulanıb ki, Heydər Əliyev strategiyasının layiqli davamçısı Prezident İlham Əliyevin hər bir yaşayış məntəqəsinin dayanıqlı və keyfiyyətli içməli su ilə təmin edilməsi barədə tapşırıqlarına uyğun olaraq bu gün 50-dən artıq rayonda içməli su və kanalizasiya layihələri icra olunur ki, bunların 40-da tikinti işlərinə başlanılıb. Artıq bu şəhərlərin bəzisində layihə tam başa çatıb, bəzisində içməli su şəbəkəsi üzrə işlər yekunlaşıb.
“Azərsu” ASC-nin sifarişi ilə sayca 27-ci şəhərdə - Qobustanda su təchizatı və kanalizasiya sistemlərinin yenidən qurulması üzrə tikinti işlərinə başlanılır. Qobustan rayonunda içməli su mənbələri məhduddur, rayon mərkəzində və kəndlərdə içməli su problemi müşahidə olunur.
Qeyd olunub ki, 2011-2012-ci illərdə dövlət büdcəsi vəsaiti hesabına Qobustan şəhərinin içməli su təchizatının yaxşılaşdırılması məqsədilə Təsi kəndi yaxınlığında 2 subartezian quyusu qazılıb, Təsi və Bədəllidə qaldırıcı nasos stansiyaları, anbarlar tikilib, Qobustan şəhərinə qədər 21 kilometr uzunluğunda magistral kəmər çəkilib. Bu kəmərdən artıq rayonun Cəmcəmli, Ərəbqədim və Göydərə kəndlərinə suyun verilməsi təmin edilib.
İcrasına başlanılan yeni layihə çərçivəsində isə Qobustan şəhər əhalisinin içməli su təchizatı və kanalizasiya xidmətlərindən istifadəsini əsaslı şəkildə yaxşılaşdıracaq. İşlərin 2 il müddətinə başa çatdırılması nəzərdə tutulur.
Rayon İcra Hakimiyyətinin başçısı Adil Məmmədov Qobustan şəhərinin su təchizatının və kanalizasiya sistemlərinin yenidən qurulmasının şəhərin sosial-iqtisadi inkişafına töhfə verəcəyini söyləyib. Diqqətə çatdırılıb ki, dövlətimizin başçısının diqqət və qayğısı nəticəsində son illər Qobustanda böyük quruculuq-abadlıq işləri görülür. Rayon əhalisinin kommunal problemlərinin həllinə xüsusi diqqət yetirilir. Belə ki, 2012-ci ildə Təsi kəndində qazılmış quyulardan şəhərə suyun verilməsi ötən yay müşahidə olunan quraqlıqda yarana biləcək su çatışmazlığının qarşısını aldı.
Xatırladaq ki, “Qobustan şəhərinin su təchizatı və kanalizasiya sistemlərinin yenidən qurulması” layihəsi 2030-cu ilə qədər perspektiv inkişaf nəzərə alınmaqla Qobustan şəhərində 11 700 nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb. Bu layihə çərçivəsində rayonun Təsi, Bədəlli, Sədəfli, Dərəkənd kəndlərinə də içməli su veriləcək.
Əhalinin keyfiyyətli və dayanıqlı içməli su ilə təmin edilməsi üçün Təsi kəndi yaxınlığında 6 subartezian quyusunun qazılması, məhsuldarlığı sutkada 3800 kubmetr olan əks-osmos tipli sutəmizləyici qurğunun, su mənbəyində nasos stansiyasının, Daşarası və Nərimankənd kəndlərində ümumi tutumu 2000 kubmetr olan 4 su anbarının, 7,1 kilometr uzunluğunda anbarlararası xəttin inşası nəzərdə tutulur.
Layihə çərçivəsində Qobustan şəhərində 61,4 kilometr uzunluğunda içməli su şəbəkəsi tikiləcək, 3007 ünvana birləşmə veriləcək. İçməli su və kanalizasiya xidmətlərindən istifadənin dəqiq hesabatının aparılması məqsədilə hər bir abunəçinin smart-kart tipli sayğacla təmin edilməsi nəzərdə tutulur.
Layihəyə uyğun olaraq Qobustan şəhərində kanalizasiya sistemi də yaradılacaq. Bu məqsədlə 52,1 kilometr uzunluğunda kanalizasiya şəbəkəsi, 7 kilometr kanalizasiya kollektoru tikiləcək və 2875 ünvana birləşmə veriləcək. Qobustan şəhərində tullantı suların təmizlənib zərərsizləşdirilməsi şəhərin kənarında inşa ediləcək və məhsuldarlığı sutkada 2500 kubmetr olan çirkab sutəmizləyici qurğuda həyata keçiriləcək.
Layihənin icrasının 2017-ci ilin ortalarında başa çatdırılması nəzərdə tutulur.
Bölmənin digər xəbərləri
