CƏMİYYƏT
Qripə yoluxmamaq üçün hansı profilaktik tədbirlər görülməlidir? VİDEO
Bakı, 27 dekabr (AZƏRTAC). Havaların soyuması infeksion xəstəliklərin, o cümlədən qripə yoluxmaların sayını artırmışdır.
Qrip soyuqdəymənin ağırlaşmış formasıdır. Soyuqdəymə zamanı bədənin müəyyən hissəsi ağrıyırsa, qripə yoluxduqda bütün bədən əzginləşir. Qrip yuxarı tənəffüs yollarının selikli qişalarının zədələnməsi ilə xarakterizə olunan kəskin virus infeksiyasıdır. Əsas simptomları titrəmə, qızdırma, boğaz ağrısı, əzələ ağrıları, kəskin baş ağrısı, öskürmə, zəiflik və ümumən narahatlıqdır. Qrip simptomları virusa yoluxmadan 1 və ya 2 gün sonra başlayır. Həkimlərin qənaətinə görə, qrip 3-5 gün ərzində inkubasiya dövrü keçirir. Əgər xəstəlik kəskinləşməyibsə bu müddət ərzində xəstə sağala bilər.
Bəs qripə yoluxmamaq üçün hansı qabaqlayıcı tədbirlər görülməlidir? AZƏRTAC-ın bu sualını 3 nömrəli təcili tibbi yardım stansiyasının həkimi Salman Babayev cavablandırmışdır.
Salman Babayev bildirmişdir ki, qripə tutulmuş xəstələrin böyük bir qismi evdə müalicə olunur. Belə xəstələr mütləq spirtli içkidən və siqaretdən imtina etməli və çoxlu istirahət etməlidirlər. Xəstəliyə yoluxmamaq üçün geyimin də böyük rolu vardır. Çalışmaq lazımdır ki geyim sintetik deyil, təbii materiallardan hazırlanmış paltarlar olsun.
Qrip çoxları üçün adi xəstəlik hesab olunsa da, vaxtında qarşısı alınmasa orqanizmə ağırlaşma verərək meningit, astma, bronxit, qaymorit kimi xəstəliklərə yol aça bilər. Bu xəstəliklər isə əksər hallarda müalicə edildikdə, belə orqanizmdən tam sovrulmur.