QUSARDAKI ŞEYX CÜNEYDTÜRBƏSİ BƏRPA OLUNUR

09.11.2006 [10:43]
Çap et
A⁺ A^-

AZƏRTAC-ın müxbiri xəbər verir ki, Qusar rayonunun Həzrə kəndindəki Şeyx Cüneyd türbəsində ilin əvvəlindən başlanmış əsaslı təmir və bərpa işləri başa çatmaq üzrədir. Mədəniyyət və Turizm Nazirliyi bu işlərə 1 milyon 600 min manat vəsait ayırmışdı.

Türbənin maraqlı tarixi vardır. 1460-cı ildə Ərdəbil şeyxi Cüneyd Dağıstan və Şirvana yürüş edərək öz qoşunu ilə bu əraziyə gəlir. Həmin il mart ayının 3-də Samur çayı sahilində Cüneyd Şirvanşah Xəlilullahın və Qaraqoyunlu hökmdarı Cavanşahın birləşmiş qüvvələrinə qarşı qanlı döyüşdə məğlub olur. Ağır yaralanan Şeyx bir neçə gündən sonra Həzrə kəndində vəfat edir və yerli sakinlər tərəfindən burada dəfn edilir. Ölümündən 84 il sonra onun cəsədi nəvəsi, Səfəvi hökmdarı I Təhmasib tərəfindən Ərdəbilə aparılıb doğma torpağa tapşırılır. I Təhmasib babasının xatirəsinə həm Ərdəbildə, həm də indiki Qusar rayonunun Həzrə kəndində eyni tipli türbə tikdirir. Həzrədəki türbənin inşasında Ərdəbil sənətkarları da iştirak etmişlər.

Təmir və bərpa işləri başa çatdıqdan sonra tarixi abidə respublikamızın turizm marşrutuna salınacaqdır.