QUŞÇULUQ MƏHSULLARININ SATIŞ-YARMARKALARI BAHALAŞMANIN QARŞISINI ALIR
AZƏRTAC xəbər verir ki, mayın 11-də Bakı şəhərinin “Təzə bazar” MMC-də, 3-cü mikrorayon və Sabunçu bazarlarında quşçuluq məhsullarının növbəti satış-yarmarkaları keçirilmişdir.
Yarmarkalarda alıcılara keyfiyyətli və bazar qiymətlərindən ucuz toyuq əti və yumurta təklif olunmuşdur. “Təzə bazar” MMC-nin ərazisindəki yarmarkada Hövsan, İmişli, Goradil, Giləzi, Mərdəkan və digər quşçuluq fabriklərindən gətirilmiş məhsullar satılmışdır.
İmişli broyler fabrikinin işçisi Həsən Həsənov satışa çıxardığı toyuq əti, içalat, file məhsullarının hər kiloqramını müvafiq olaraq 2 manat 50 qəpiyə, 2 manat 20 qəpiyə və 3 manat 20 qəpiyə satırdı. Alıcılar qiymətlərdən razılıq edir və təzə məhsulları həvəslə alırdılar. Giləzi fabrikindən Sabir Babayev satışa 7 min 200 ədəd əla keyfiyyətli yumurta çıxardığını bildirdi. Mərdəkan broyler fabrikindən İlqar Əsgərov, Hövsan “Səma gül” broylerdən Heydər Babayev, Giləzi MMC-dən Sabir Qarayev, Goradil quşçulıuq fabrikindən Rəfail Əliyev və başqaları əhaliyə yumurtanı 8, 9 qəpiyə, toyuq ətini 2 manat 50 qəpiyə təklif edərək, bu məhsulları bazarlardan və mağazalardan xeyli ucuz satdıqlarını, yarmarkada yaradılan nümunəvi şəraitdən razı qaldıqlarını söylədilər.
İqtisadi İnkişaf Nazirliyi mətbuat xidmətinin rəhbəri Abbas Əliyevin sözlərinə görə, bu gün şəhərin yarmarkalarında satışa 20 tondan çox toyuq əti və 500 min ədəd yumurta çıxarılmışdır. Satış-yarmarkalar şənbə və bazar günləri də davam etdiriləcəkdir.
Bölmənin digər xəbərləri
