Rafael Hüseynov: Etnik və dini məsələlər ən kiçik qığılcımdan alovlana bilər
Strasburq, 28 yanvar, AZƏRTAC
Cəmiyyət həyatının bəzi məsələlərinə ehtiyatla, diqqətlə və həssas yanaşmalıyıq. Çünki bu sahələrdə bəzən ən kiçik qığılcımdan güclü, genişmiqyaslı yanğınlar yaranması ehtimalı böyükdür.
Etnik və dini məsələlər məhz bu qəbil məsələlərdəndir və ən kiçik qığılcımdan alovlana bilər. Avropa Şurasında yeni əsrdəki sessiyalarımızın əksəriyyətində dinlər və mədəniyyətlər arasındakı əlaqələr, millətçilik, irqçilik, ksenofobiya, islamofobiya, dini və etnik tolerantlıq mövzularında dönə-dönə qızğın müzakirələr aparmışıq. Sanki gizli və məkrli bir əl mütəmadi olaraq bu ocağı alovlandırmaq, təşvişli nöqtələr yaratmaq üçün çalışmaqdadır.
AZƏRTAC xəbər verir ki, bu fikirləri AŞPA sessiyasının son günündə “Avropada etnik profilləşmə: böyük narahatlıq doğuran məsələ” adlı məruzə il bağlı debatlarda qurumdakı nümayəndə heyətimizin üzvü Rafael Hüseynov dilə gətirib.
İndiki mürəkkəb və sıxıntılı dövrdə, pandemiyanın ölkələri qapalı, əlaqələri maksimal dərəcədə məhdud etdiyi vaxtda da, təəssüf ki, həmin qara qüvvələr öz məkrli əməllərini davam etdirirlər.
“Müasir dünya elə mərhələdədir ki, “Vətən” anlayışının sərhədləri çox genişlənib. Dünya miqyasında xalqlar qaynayıb qarışıb. Nə vaxtsa Avropa şəhərinə köçüb gəlmiş asiyalı və ya Amerikanı özünə daimi yaşayış yeri seçmiş afrikalı gəlmə sayılırdısa, onun həmin yerlərdə doğulub böyüyən övladları artıq avropalı və ya amerikalı olubdur. Nəsillər dəyişdikcə bu proses daha da dərinləşir. Ona görə Fransada “Charlie Hebdo” ilə bağlı 2015-ci ildəki acı dərslərdən ibrət almayanların törətdiyi təxribat və bu qəbil arzuolunmaz hərəkətlər böyük narahatlığa səbəb olur. Hər hansı dinə və o dinin müqəddəslərinə qarşı aşağılayıcı, təhqiramiz hərəkət minlərlə, on minlərlə və daha çox insanın heysiyyətinə toxunmaq deməkdir. Ağlı başında, mənəviyyatı sağlam olan insan heç vaxt belə çirkin hərəkətlərə yol verməz. Əgər edirsə, demək, onu bu istiqamətə yönəldən var, bu addımın arxasında bəd niyyət dayanır. Niyə axı dünyanı, insanı rahat yaşamağa qoymursunuz, yox yerdən münaqişələr, ədavətlər, qarşıdurmalar yaratmaq istəyirsiniz?!”, - deyə R.Hüseynov diqqətə çatdırıb.
Qeyd edib ki, bəzən böyük bir ölkənin rəhbəri olmaq kimi son dərəcə yüksək məsuliyyətli vəzifəni daşıyan insan hər hansı qəzet və ya jurnalın başqa dinin ən ali müqəddəslərinə və dəyərlərinə qarşı təhqiramiz yazıları, rəsmləri və davranışlarını anlaşılmaz sinizimlə guya söz, ifadə azadlığı kimi şərh etməsi qəbuledilməzdir. Azadlıqla azğınlığın fərqi çox böyükdür. Bu fərqi görməyəndə və ya görmək istəməyəndə, qorxulu və idarə olunmaz ocaqların alışması təhlükəsi həmişə labüd olur.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
