RƏSMİ KİŞİNYOV DÜNYA BİRLİYİNİ SEPARATÇI DNESTRYANIYA DİQQƏT YETİRMƏYƏ ÇAĞIRIR
AZƏRTAC-ın xüsusi müxbiri Moldova Xarici İşlər və Avropa İnteqrasiyası Nazirliyinin mətbuat xidmətinə istinadla xəbər verir ki, Kişinyov Dnestryanı münaqişənin nizama salınması prosesinin bütün iştirakçılarını Tiraspolun konstrujtiv danışıqları bərpa etməsi üçün bütün mövcud imkanlardan istifadə etməyə çağırmışdır. Bu, ATƏT-in daimi Şurasının martın 22-də keçirilən iclasında bildirilmişdir.
İclasda Moldova nümayəndə heyəti vurğulamışdır ki, münaqişənin həllinə dair səmərəli dialoq yalnız Tiraspol Dnestryanı regionun silahsızlaşdırılması məqsədi ilə konkret addımlar atdığı təqdirdə mümkündür.
Avropa İttifaqı, Ukrayna və Moldova Dnestryanını konstruktiv mövqe tutmağa və danışıqlar masası arxasına keçməyə çağırmışlar. ABŞ və Moldova nümayəndələri bildirmişlər ki, nəzarət məntəqələri və Dnestryanı tərəfin rüsumlar toplaması, habelə Kişinyovda akkreditə olunmuş diplomatların və beynəlxalq təşkilatların regiona buraxılmaması Rusiya Federasiyası ilə Moldova Respublikası arasında 1992-ci il iyulun 21-də imzalanmış atəşkəs sazişinə ziddir.
ABŞ və Moldova Rusiyanı məsələnin tezliklə həll üçün Tiraspol hökumətinə nüfuzundan istifadə etməyə çağırmışlar.
Bölmənin digər xəbərləri
