Elçin Babayev: Təhsil müəssisəsi yalnız məlumat verməməli, ilk növbədə, düşünməyi öyrətməlidir
Bakı, 5 oktyabr, AZƏRTAC
Müasir dünyada sürətli və fundamental dəyişikliklər baş verir. Süni intellekt həyatın və əmək bazarının müxtəlif sahələrinə sürətlə inteqrasiya olunur, yeni peşələr yaranır, bəzi peşələr isə sıradan çıxır.
AZƏRTAC xəbər verir ki, bu fikirləri Bakı Dövlət Universitetinin rektoru Elçin Babayev “Təhsildə yeni çağırışlar” VII Beynəlxalq Forumunda çıxışı zamanı deyib. Rektor bildirib ki, bütün bunlar təhsil qarşısında gələcəyin insanının necə hazırlanması, təhsil müəssisələrinin dəyişən dünyaya necə uyğunlaşması və fundamental missiyasını necə qoruması ilə bağlı mühüm suallar yaradır.
Bu gün tələbə və şagird dünyanın ən böyük informasiya resurslarına çıxış imkanına malikdir və sualın cavabını qısa müddətdə əldə edə bilir. Yeni reallıqda təhsil müəssisəsinin missiyası yalnız məlumat verməklə məhdudlaşmamalıdır. Məlumatın həcmi artdıqca onun seçilməsi, təhlili və düzgün qiymətləndirilməsi daha böyük əhəmiyyət kəsb edir. Təhsil insanın düşüncə tərzini formalaşdırır, yaradıcılıq potensialını üzə çıxarır və məsuliyyət hissini gücləndirir.
Rektor 2025-ci il PISA nəticələrinə əsasən Azərbaycanın əvvəlki qiymətləndirmə dövrləri ilə müqayisədə riyazi savadlılıq, təbiət elmləri və oxu üzrə əhəmiyyətli irəliləyiş göstərdiyini diqqətə çatdırıb. Elçin Babayev bildirib ki, PISA-nın əhəmiyyəti yalnız rəqəmlərlə ölçülmür. Bu qiymətləndirmə şagirdlərin əldə etdikləri bilikləri real həyatda tətbiq etmək, problemləri həll etmək və düşünmək bacarıqlarını da qiymətləndirir.
“Əldə olunan nəticə heç də son nöqtə deyil, yeni mərhələlərin, yeni uğurların başlanğıcıdır.
Daha təhsilli gələcək daha güclü insan kapitalı, innovativ və davamlı inkişaf, yüksək sosial rifah, etibarlı təhlükəsizlik və dayanıqlı yüksəliş deməkdir.
Prezident İlham Əliyevin oktyabrın 2-də Yeni Azərbaycan Partiyasının VIII Qurultayında səsləndirdiyi fikirlər də bu baxımdan xüsusi əhəmiyyət daşıyır. Dövlətimizin başçısı müasir informasiya mühiti, internet, kibertəhlükəsizlik və süni intellektlə bağlı risklərdən danışarkən təhsilin rolunu xüsusi vurğuladı.
Bu yanaşma müasir cəmiyyətdə təhsilin daşıdığı məsuliyyəti aydın şəkildə ortaya qoyur”,- deyə Elçin Babayev qeyd edib.
Bölmənin digər xəbərləri
