RESPUBLİKA AĞSAQQALLAR ŞURASININ SƏDRİ AKADEMİK BUDAQ BUDAQOVUN Ç I X I Ş I
Bu il aprel ayının 23-də respublika ağsaqqallarının geniş iclası oldu. Oraya respublikanın bütün rayonlarından ağsaqqallar toplaşmışdılar. Bizim gündəliyimizdə bir məsələ dururdu. O da möhtərəm Prezidentimiz Heydər Əliyevin namizədliyini irəli sürmək, onun namizədliyini müdafiə etmək və oktyabrın 15-də keçiriləcək seçkilərdə bütün ağsaqqalları, onların təsir dairəsində olan şəxsləri bu seçkilərdə fəal iştirak etməyə cağırmaqdan ibarət olmuşdur. Cənab Heydər Əliyevin şəxsiyyəti bizim hamımıza məlumdur. Onda uzaqgörənlik, dərin təfəkkür, dövlətçilik məharəti, bir çox mürəkkəb problemləri həll etmək, onların nə vaxtsa həll olunacağını bu başdan görmək qabiliyyəti, istedadı vardır. Düzdür, cənab Heydər Əliyev onun qədrini bilənlər, onu dərk edənlər, başa düşənlər, onun fəaliyyətindən xəbərdar olanlar, onu düzgün qiymətləndirmək qabiliyyəti, təfəkkürü olanlar üçün böyük şəxsiyyətdir. Bu sahədə geniş iş aparmaqla biz, əlbəttə, təkcə təmsil etdiyimiz ictimai təşkilatlara yox, eyni zamanda respublikamıza, ölkəmizin gələcək inkişafına, Azəbaycanın beynəlxalq aləmdə mövqeyinin daha da möhkəmlənməsinə xidmət etmiş oluruq. Bizim qarşımızda bir çox məsələlər durur. Onlardan biri millətimizin, xalqımızın maddi rifahının yaxşılaşdırılmasıdır. Respublikamızda bu sahədə çox ciddi addımlar atılır. Bunların hamısı sizə məlumdur. İşğal olunmuş torpaqlarımızın geri qaytarılması istiqamətində çox ciddi işlər aparılır. Bu məsələnin uğurla başa çatacağı bu gün bizə məlumdur. Ümumiyyətlə, qarşıda Azərbaycanda ictimai-siyasi, iqtisadi sahələrdə aparılan işləri uğurla davam etdirmək kimi mühüm məsələlər durur. Bu məsələlər əlbəttə geniş ictimaiyyətin yaxından köməyi və möhtərəm Prezidentimiz Heydər Əliyevin başçılığı ilə həyata keçirilir və bundan sonra da keçiriləcəkdir. Bu isə bizim istək və arzularımızın yerinə yetirilməsi və millətimizin, xalqımızın daha firavan yaşamasına xidmət etmək deməkdir.Respublika Ağsaqqlar Şurasının sədri kimi mənim də bu ictimai hərəkatda iştirakım çox təbiidir və qəlbimizdən gələn istək və arzularımızın nəticəsidir. Güman edirəm ki, nəinki biz özümüz ayrı-ayrılıqda respublika miqyasında bu sahədə görülən işlərdə çox fəal iştirak etməliyik, həm də təşkilatlanmış halda istək və arzularımıza nail olmalıyıq. Çünki, bizim namizədimiz elə bir şəxsiyyətdir ki, o, həyatın ən çətin imtahanlarından qüdrətlə çıxıbdır. Onun namizədliyi millətimizin ürəyindən, istək və arzusundan irəli gəlmişdir. O, XX əsrdə ilahinin Azərbaycan xalqına bəxş etdiyi xilaskardır. Bu qüdrətli şəxsiyyət möhtəşəm dağ kimi hər tərəfdən aydın görünür. Bizim bu gün təməlini qoyduğumuz ictimai hərəkatımızın fəaliyyəti çox uğurlu olacaqdır. Çünki bizim o möhtəşəm dağ kimi dayağımız vardır.Sağ olun.
Bölmənin digər xəbərləri
