Respublikanın bütün təhsil müəssisələrində birinci dərs Xocalı faciəsinin 21-ci ildönümünə həsr edilmişdir
Bakı, 25 fevral (AZƏRTAC). Fevralın 25-də respublikanın bütün ümumtəhsil, ilk peşə-ixtisas, məktəbəqədər və məktəbdənkənar təhsil müəssisələrində ilk dərs saatı Xocalı soyqırımının 21-ci ildönümünə həsr edilmişdir.
AZƏRTAC xəbər verir ki, bu, təhsil naziri Misir Mərdanovun respublikanın bütün ümumtəhsil müəssisələrində Xocalı soyqırımının 21-ci ildönümünün keçirilməsi barədə imzaladığı müvafiq əmrə əsasən həyata keçirilmişdir.
İlk dərs saatında məktəbli və tələbələrə Xocalı ilə bağlı müxtəlif məlumatlar verilmiş, ermənilərin zaman-zaman həyata keçirdikləri etnik təmizləmə və deportasiya siyasəti, xalqımızın başına gətirdikləri müsibətlərdən söhbət açılmışdır. Həmçinin şagirdlərin bu mövzuda məruzələri dinlənilmişdir.
Xatırladaq ki, Xocalı soyqırımının 21-ci ildönümü ilə bağlı ali və orta ixtisas təhsili müəssisələrinin internet səhifələrinə Xocalı soyqırımını əks etdirən məlumatlar daxil edilmiş, ümumtəhsil, ilk peşə-ixtisas, ali və orta ixtisas təhsili müəssisələrində Xocalı soyqırımına həsr olunmuş rəsm sərgiləri açılmış, ədəbi-bədii kompozisiyalar təqdim olunmuş, sənədli və bədii filmlər nümayiş etdirilmişdir.
Bölmənin digər xəbərləri
