Romada Azərbaycan-İtaliya turizm forumu keçirilmişdir VİDEO
Roma, 18 noyabr (AZƏRTAC). Noyabrın 18-də Romada ilk dəfə olaraq Azərbaycan-İtaliya turizm forumu keçirilmişdir.
Azərbaycanın Mədəniyyət və Turizm Nazirliyinin, ölkəmizin İtaliyadakı səfirliyinin, İtaliya-Azərbaycan Assosiasiyasının birgə təşkilatçılığı ilə keçirilən forumda turizm sahəsində bu ölkədə fəaliyyət göstərən dövlət və özəl qurumların, turizm institutlarının təmsilçiləri və KİV nümayəndələri iştirak etmişlər.
Tədbiri açan Azərbaycanın İtaliyadakı səfiri Vaqif Sadıqov bildirmişdir ki, Azərbaycanda və İtaliyada turizm sahəsi ilə bağlı müxtəlif mövzuları müzakirə etmək üçün əlverişli imkan yaradan forumun əsas məqsədi ölkələrimiz arasında turizm əməkdaşlığını genişləndirmək və turist axınını artırmaqdır. Qeyd olunmuşdur ki, Azərbaycanda qeyri-neft sektorunun mühüm hissəsinə çevrilmiş turizm sənayesi çox böyük sürətlə inkişaf edir. Bir sıra ölkələrin turizm şirkətlərinin Azərbaycana marağı getdikcə artmaqdadır.
Ölkəmizin turizm sektoru haqqında məlumat verən diplomat bu sahənin inkişafı üçün əməli tədbirlər görüldüyünü, zəruri infrastruktur yaradıldığını vurğulamışdır. Qeyd etmişdir ki, görülən işlərin nəticəsində ölkəmizə turist axını ildən-ilə artır. Cənubi Qafqazın lider dövlətinə çevrilən Azərbaycanda bir-birindən gözəl, memarlığı ilə fərqlənən, beynəlxalq standartlara cavab verən bir sıra turizm obyektləri və hava limanları istifadəyə verilmişdir.
Azərbaycan-İtaliya münasibətlərinə toxunan səfir bildirmişdir ki, xalqlarımız arasındakı əlaqələr qədim tarixə malikdir. 1997-ci ildə ümummilli lider Heydər Əliyevin İtaliyaya ilk rəsmi səfəri dövlətlər arasında bütün sahələrdə münasibətlərin inkişafı üçün əhəmiyyətli addım olmuşdur. Əlaqələrimizin daim yüksələn xətlə inkişaf etdiyini deyən diplomat diqqətə çatdırmışdır ki, Azərbaycan İtaliya üçün mühüm tərəfdaş olan ölkələrdən biridir.
Sonra italiyalı rejissor Daniele Karminati tərəfindən çəkilmiş “Azərbaycan: odlar yurdu” adlı sənədli film nümayiş olunmuşdur.
Forumda çıxış edən mədəniyyət və turizm nazirinin birinci müavini Vaqif Əliyev Azərbaycan-İtaliya dostluq münasibətlərinin qədim tarixə və ənənələrə söykəndiyini vurğulayaraq demişdir ki, yüksək səviyyəli qarşılıqlı səfərlər bu əlaqələrin daha da inkişaf etməsinə təkan vermişdir. Enerji təhlükəsizliyi, kənd təsərrüfatı və iqtisadiyyatın digər sahələrində geniş əməkdaşlıq əlaqələri qurulmuşdur. Ölkələrimiz arasındakı mədəni əlaqələrdən danışan nazir müavini bildirmişdir ki, təkcə son iki ildə İtaliyada Azərbaycan mədəniyyətinə və incəsənətinə dair bir sıra tədbirlər keçirilmişdir. Heydər Əliyev Fondunun dəstəyi ilə təşkil olunmuş “Bakıya uçuş: Müasir Azərbaycan incəsənəti” adlı sərgini təşkilini xüsusi vurğulamaq olar. Bütün bunlar mövcud dostluq əlaqələrinin yüksək səviyyəsindən xəbər verir.
Vaqif Əliyev Azərbaycanın dünyada turizm sahəsində önəmli ölkə olduğunu diqqətə çatdıraraq bildirmişdir ki, əlverişli iqlim şəraitinə, füsunkar təbiətə, zəngin mədəni-mənəvi irsə, mətbəx mədəniyyətinə malik Azərbaycanda turizmin inkişaf perspektivləri bir sıra beynəlxalq təşkilatlar tərəfindən də yüksək dəyərləndirilmişdir.
Nazir müavini qeyd etmişdir ki, Prezident İlham Əliyev tərəfindən 2011-ci ilin Azərbaycanda “Turizm ili” elan edilməsi dövlət səviyyəsində turizmin inkişafına verilən dəstəyin əyani sübutudur. Bu kimi tədbirlərin nəticəsində ölkəmizdə turizm sənayesi yeni mərhələyə qədəm qoymuşdur.
Azərbaycanda dövlət tərəfindən qış turizminin inkişafına göstərilən dəstəyə də toxunan nazir müavini vurğulamışdır ki, qışda respublikamıza gələn əcnəbi turistlərin sayının artması, ilk növbədə ölkəmizin sürətli inkişafının göstəricisidir. Regionun lider dövləti olan Azərbaycan turizm sahəsində də bir sıra uğurlu layihələr həyata keçirir. Məqsəd ölkəmizə ilin bütün fəsillərində, xüsusən də qış mövsümündə turistləri cəlb etməkdir. Qusar rayonunda Şahdağ Qış-Yay Turizm Kompleksi qapılarını qonaqların üzünə açdığı ilk günlərdən turistlərin böyük marağına səbəb olmuşdur. Bu, turizm sahəsində həyata keçirilən ən böyük layihələrdən biridir.
Vaqif Əliyevin sözlərinə görə, Azərbaycanda turizmin inkişafı istiqamətində həyata keçirilmiş önəmli tədbirlərdən biri də elektron viza sisteminin tətbiqidir. Yeni sistemin tətbiqi Azərbaycana turist axınını artırmaqla, bütövlükdə ölkəmizin turizm sektorunun daha da inkişafına gətirib çıxaracaqdır. Bu sistem sənədləşmənin daha asan aparılmasına və vaxta qənaət edilməsinə şərait yaradır. Müasir mehmanxanalar, ticarət mərkəzləri, restoranlar, muzeylər, beynəlxalq standartlara cavab verən nəqliyyat infrastrukturu, təhlükəsiz mühit, parklar, əyləncə məkanları və yaradılan digər imkanlar ölkəmizin dünyada turizm mərkəzi kimi tanınması baxımından mühüm əhəmiyyət kəsb edir.
Forumun Azərbaycan-İtaliya münasibətlərinin inkişafında mühüm rola malik olduğunu deyən İtaliyanın mədəniyyət və turizm nazirinin müavini xanım Simonetta Giordani ölkələrimiz arasındakı əlaqələrdən danışmışdır. Diqqətə çatdırmışdır ki, bu forum iki ölkə arasında turizm sahəsində əməkdaşlığın genişlənməsinə mühüm töhfə verəcək, əlaqələrin inkişafında yeni səhifə açacaqdır. Simonetta Giordani burada aparılan müzakirələrin ölkələrimizin iş adamlarını yeni layihələr həyata keçirməyə təşviq edəcəyinə əminliyini bildirmişdir. Qeyd etmişdir ki, bu cür tədbirlər təcrübə mübadiləsi baxımından da geniş imkanlar yaradır.
Forum işini “Turizm - Azərbaycan və İtaliya arasında münasibətlərin mühüm istiqaməti kimi: imkanlar və perspektivlər”, “Azərbaycan və İtaliya arasında turizm əməkdaşlığının təşviq edilməsi üçün vasitələr”, “Ekoturizm: inkişaf və ətraf mühit”, “İdman turizmində yeni dövr” və digər mövzularda sessiyalar ilə davam etdirmişdir.
Tədbir çərçivəsində ölkəmizin mədəniyyətini, incəsənətini, turizmini və digər sahələrini əhatə edən italyan dilində jurnallar, qəzetlər və kitablar nümayiş olunmuşdur.
Forumda, həmçinin Azərbaycanda fəaliyyət göstərən turizm şirkətlərinin nümayəndələri bir sıra görüşlər keçirmiş, ölkələrimizin turizm sahəsində əməkdaşlığı ətrafında geniş müzakirələr aparmışlar.
Maqsud Dadaşov
AZƏRTAC-ın xüsusi müxbiri
Roma
Bölmənin digər xəbərləri
