MƏDƏNİYYƏT
RUHU MİSRALARINDA YAŞAYAN ŞAİRİN XATİRƏSİ YAD EDİLMİŞDİR
AZƏRTAC xəbər verir ki, XX əsr Azərbaycan klassik şerinin görkəmli nümayəndəsi Əlağa Vahidin vəfatının 43-cü ildönümü ilə bağlı oktyabrın 1-də Fəxri xiyabanda anım günü keçirilmişdir.
Tədbirin iştirakçıları əvvəlcə ümummilli lider Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi anılmış, məzarı üstünə tər qərənfillər düzülmüşdür.
Sonra ədəbiyyat və incəsənət xadimləri, ictimaiyyət nümayəndələri Ə.Vahidin məzarı önünə gəlmiş, ruhuna dualar oxumuş, məzarı üzərinə gül dəstələri qoymuşlar.
“Vahid” ədəbi məclisinin sədri hacı Rafiq Şirvanlı ruhu misralarında yaşayan şairin həyat və yaradıcılığından danışmış, ölümündən 43 il keçməsinə baxmayaraq xalq tərəfindən böyük sevgi ilə daim yad edildiyini bildirmişdir. .
Milli Konservatoriyanın kafedra müdiri Telman Hacıyev Ə. Vahidin qəzəllərinin dilinin sadəliyi ilə seçildiyini, şairin Azərbaycan qəzəlini xəlqiləşdirdiyini söyləmişdir.
Mərasimdə Əlağa Vahid haqqında şeirlər və onun sözlərinə yazılmış mahnılar ifa edilmişdir.
Sonda qəzəlxanın oğlu Ramiz Vahidoğlu tədbir iştirakçılarına təşəkkürünü bildirmişdir.