RUMINİYA DİPLOMATININ YUBİLEYİNƏ HƏSR OLUNMUŞDUR
Azərbaycan Milli Elmlər Akademiyasında Rumıniyanın görkəmli siyasi xadimi və diplomatı Nikolae Tituleskunun anadan olmasının 120 illiyinə həsr edilmiş konfrans keçirilmişdir. Konfransı giriş sözü ilə MEA-nın prezidenti Mahmud Kərimov açmışdır.
Sonra Rumıniyanın Azərbaycandakı səfiri Təhsin Cəmil çıxış edərək, N.Tituleskunun həyat və fəaliyyətindən danışmışdır. Səfir bildirmişdir ki, uzun illər diplomatik işdə çalışan Titulesku Parisdəki Beynəlxalq Diplomatiya Akademiyasının yaradıcılarından biri, Millətlər Cəmiyyətinin sədri olmuş, Rumıniya Akademiyasının üzvü seçilmişdir. O, Avropada kollektiv təhlükəsizlik sisteminin yaradılması uğrunda çıxış edirdi.
Konfransda akademik Cəmil Quliyevin, fəlsəfə elmləri doktoru R.Əzimovanın, siyasi elmlər doktoru H.Hüseynovun, tarix elmləri doktoru M.Qasımovun yubilyarla bağlı müxtəlif mövzularda məruzələri dinlənilmişdir. Azərbaycan-Rumıniya cəmiyyətinin üzvü, H.Cavidin ev-muzeyinin şöbə müdiri A.Abbasova ölkələrimiz arasında əlaqələrdən danışmışdır.
Bölmənin digər xəbərləri
