Rumıniyada keçirilən prezident seçkilərinin “exit-poll” nəticələri məlum olub
Buxarest, 5 may, AZƏRTAC
Rumıniyada keçirilən 2025-ci il prezident seçkilərinin birinci turunun ilkin “exit-poll” nəticələri açıqlanıb. AZƏRTAC xəbər verir ki, sorğulara əsasən, Corce Simion birinci yerdədir. İkinci yer uğrunda isə Krin Antonesku ilə Nikuşor Dan arasında gərgin rəqabət müşahidə olunur.
“Avangarde” şirkətinin saat 19:00-a olan nəticələri göstərir ki, Corce Simion – 30 faiz, Krin Antonesku – 23 faiz, Nikuşor Dan – 23 faiz, Viktor Ponta – 15 faiz, Elena Laskoni – 4 faiz, digər namizədlər – 5 faiz səs toplayıblar.
KURS (CURS) şirkətinin isə saat 20:00-a olan nəticələri (Rumıniyanın xaricdəki diasporu istisna olmaqla) aşağıdakı nəticələri göstərir:
Corce Simion – 33,1 faiz
Krin Antonesku – 22,9 faiz
Nikuşor Dan – 20,9 faiz
Viktor Ponta – 14,7 faiz
Elena Laskoni – 4 faiz
Məlumata görə, Corce Simion hər iki sorğuda lider mövqedə qərarlaşıb və ikinci tura keçməsi demək olar ki, dəqiqdir. Lakin ikinci yer uğrunda Krin Antonesku ilə Nikuşor Dan arasında çox az fərq var. Bu səbəbdən, Rumıniyanın xaricdəki diasporundan gələn səslər həlledici rol oynaya bilər.
Viktor Ponta dördüncü yerdə qərarlaşıb və ikinci tura keçmək şansı görünmür. Elena Laskoni isə gözlənildiyi kimi zəif nəticə göstərib - yalnız 4 faiz səs.
Rəsmiləşdirilmiş nəticələr Mərkəzi Seçki Bürosu (BEC) tərəfindən açıqlanacaq. İlkin göstəricilər Simion – Antonesku və ya Simion – Dan cütlüyünün ikinci tura keçə biləcəyini göstərir.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
