Rus politoloq: Azərbaycan olmadan Sovet İttifaqı İkinci Dünya müharibəsində qələbə qazana bilməzdi
Bakı, 8 may, AZƏRTAC
İkinci Dünya müharibəsində faşizm üzərində qələbənin əldə olunmasında Azərbaycanın rolu tarixi faktlarla təsdiqlənən mühüm səhifələrdən biridir. Müharibə illərində yüz minlərlə azərbaycanlı cəbhədə döyüşüb, on minlərlə soydaşımız həyatını itirib. Bakı nefti sovet ordusunun əsas enerji təminatçısı kimi qələbənin taleyində həlledici rol oynayıb. Azərbaycan həm də arxa cəbhə olaraq yaralıların müalicəsində, qaçqınların yerləşdirilməsində və hərbi sənayenin fasiləsiz fəaliyyətində mühüm missiya yerinə yetirib. Eyni zamanda, lend-liz proqramı çərçivəsində müttəfiqlər tərəfindən göndərilən hərbi texnika və silah-sursatın SSRİ-yə çatdırılmasında Azərbaycanın strateji coğrafi mövqeyi xüsusi əhəmiyyət daşıyıb. Bu baxımdan, 9 May təkcə hərbi qələbə deyil, həm də Azərbaycan xalqının göstərdiyi fədakarlığın və tarixi xidmətlərin simvolu kimi qiymətləndirilir.
Mövzu ilə bağlı Rusiya Federasiyasının birinci dərəcəli dövlət müşaviri, politoloq Tatyana Poloskova AZƏRTAC-a açıqlamasında bildirib ki, İkinci Dünya müharibəsində faşizm üzərində qələbənin qazanılmasında Azərbaycanın rolu danılmazdır. Əgər Azərbaycan olmasaydı, Sovet İttifaqı müharibədə qələbə qazana bilməzdi. Çünki ordunun əsas enerji təminatı məhz Bakı nefti hesabına həyata keçirilirdi. Əgər bu neft olmasaydı, tankların və təyyarələrin hərəkəti mümkün olmazdı.
O qeyd edib ki, tarixi araşdıran və ya İkinci Dünya müharibəsinin gedişi ilə maraqlanan hər kəs Azərbaycanın həmin dövrdə oynadığı həlledici rolu yaxşı anlayır.
Politoloqun sözlərinə görə, Bakıdan həyata keçirilən neft tədarükünün təhlükəsizliyinin təmin olunmasında Azərbaycan əks-kəşfiyyatının peşəkarlığı mühüm rol oynayıb.
“Faşist qüvvələri neft yataqlarında diversiyalar hazırlayırdı. Lakin Azərbaycan əks-kəşfiyyatı bunun qarşısını aldı. Bakı sakinləri və Azərbaycan xalqı böyük qəhrəmanlıq göstərərək faşistlərin neftə çıxışına imkan vermədilər. İnsanlar könüllü dəstələrə yazılır, şəhəri və neft sənayesini qoruyurdular. Bu baxımdan, Azərbaycanın müharibəyə verdiyi töhfə hələ də lazımi səviyyədə qiymətləndirilməyib. Azərbaycan müharibə illərində yaralıların qəbulunda və müalicəsində də mühüm rol oynayıb. Azərbaycanda minlərlə yaralı əsgər müalicə olunaraq yenidən həyata qaytarılırdı. Eyni zamanda, lend-liz proqramı çərçivəsində həyata keçirilən logistika marşrutlarında da Azərbaycanın xüsusi rolu var idi. Yüklər təkcə şimal istiqamətindən daşınmırdı”.
T.Poloskova uşaqlıq illərindən Azərbaycanla bağlı xüsusi təəssüratlarının olduğunu da qeyd edib.
“Atam məni yeniyetmə yaşlarımda “Bakıda küləklər əsir” filminə aparmışdı. Mən bu gün də həmin filmin pərəstişkarıyam. Hələ uşaqlıqdan Azərbaycan əks-kəşfiyyatının peşəkarlığını və qəhrəmanlığını tanımışam. Eyni zamanda, bilirəm ki, məşhur sovet kəşfiyyatçısı Rixard Zorge də bakılı olub. Mən Rusiyada yaxınları müharibədə iştirak etmiş, tarixi yaxşı bilən insanlar adından Azərbaycana təşəkkür etmək istəyirəm. Sağ qalan veteranlarınızı ürəkdən təbrik edir, onlara sağlamlıq və firavan həyat arzulayıram”, – deyə T.Poloskova sonda bildirib.
Müxbir- Səbinə Əlizadə
Bölmənin digər xəbərləri
