Prezidentin Qarabağ səfəri zəngin proqramı və mühüm hadisələrlə yadda qaldı ŞƏRH
Bakı, 31 may, AZƏRTAC
Müstəqillik Günündə Prezident İlham Əliyevin Xankəndi, Şuşa və Xocalıya səfəri zəngin proqramı və mühüm hadisələrlə yadda qaldı. Əvvəlki səfərlərdə olduğu kimi, dövlətimizin başçısı bu dəfə də Xankəndidə və Xocalıda yeni istehsal müəssisələrinin açılışında iştirak etdi, regionun sosial-iqtisadi inkişafına yönəlmiş layihələrlə yaxından tanış oldu.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, Vətən müharibəsində qazanılmış tarixi Qələbədən sonra Prezident İlham Əliyevin rəhbərliyi ilə Qarabağda və Şərqi Zəngəzurda genişmiqyaslı bərpa və yenidənqurma işlərinə başlanılıb. Bu prosesin ən mühüm xüsusiyyətlərindən biri görülən bütün işlərin dövlətimizin başçısının şəxsi nəzarəti ilə həyata keçirilməsidir. Şəhər və kəndlərimizin bərpası təsdiq olunmuş Baş Plan əsasında aparılır və bu, regionun gələcək inkişafının sistemli şəkildə qurulmasına xidmət edir.
"İşğaldan azad olunmuş ərazilərə artıq minlərlə keçmiş məcburi köçkün qayıdıb. Doğma yurdlarına dönən sakinlər müasir standartlara cavab verən rahat ev və mənzillərlə təmin edilir, onların sosial rifahının yüksəldilməsi üçün ardıcıl tədbirlər görülür. Eyni zamanda, məşğulluq məsələsinin həlli xüsusi diqqət mərkəzində saxlanılır. Xankəndidə və Xocalıda fəaliyyətə başlayan yeni istehsal müəssisələri yüzlərlə iş yerinin yaradılmasına imkan verib. Bu müəssisələrdə yalnız yerli sakinlər deyil, ətraf rayonların əhalisi də işlə təmin olunur.
Xocalıda “Qarabağ Tekstil Evi”nin fəaliyyətə başlaması regionun iqtisadi potensialının artırılması baxımından mühüm əhəmiyyət daşıyır. Müəssisədə istehsal olunacaq məhsulların həm daxili bazarın tələbatını ödəməsi, həm də xarici bazarlara ixrac olunması nəzərdə tutulur. Dövlət tərəfindən sahibkarlara göstərilən dəstək işğaldan azad edilmiş ərazilərdə yeni istehsal və emal müəssisələrinin yaradılmasını stimullaşdırır, bölgəyə investisiyaların cəlb olunmasını sürətləndirir", - deyə K.Əliyeva vurğulayıb.
Professor əlavə edib ki, səfər çərçivəsində Prezident İlham Əliyevin Şuşa rayonunun Böyük Qaladərəsi kəndinə qayıdan sakinlərlə görüşü də xüsusi diqqət çəkdi. Səmimi şəraitdə keçən görüş zamanı Prezident İlham Əliyev vurğuladı ki, Azərbaycan bu gün həm siyasi, həm də iqtisadi baxımdan tam müstəqil, güclü və qüdrətli dövlətdir. Ölkəmizin əldə etdiyi uğurların əsasında xalqın birliyi, düzgün siyasi kurs və məqsədyönlü inkişaf strategiyası dayanır.
Müzəffər Ali Baş Komandan İlham Əliyevin rəhbərliyi ilə Azərbaycan öz suverenliyini və ərazi bütövlüyünü tam bərpa edib. Bu gün ölkəmiz işğaldan azad olunmuş ərazilərdə məhz öz iqtisadi imkanları hesabına sürətli yenidənqurma prosesini həyata keçirir, həmin torpaqlarda həyat yenidən canlanır.
"Prezident İlham Əliyev çıxışında Azərbaycanın müstəqilliyinin ilk illərində yaşanan mürəkkəb siyasi proseslərə də toxunaraq qeyd etdi ki, həmin dövrdə ölkədə yaranmış xaos və idarəetmədəki ciddi problemlər torpaqlarımızın işğalına şərait yaratmışdı. Ümummilli Lider Heydər Əliyevin hakimiyyətə qayıdışından sonra isə dövlətçilik ənənələri möhkəmləndirildi, sabitlik təmin olundu və güclü Azərbaycanın təməli qoyuldu.
Bu siyasi kursu uğurla davam etdirən Prezident İlham Əliyev Azərbaycanı regionun aparıcı dövlətlərindən birinə, beynəlxalq aləmdə söz sahibi olan ölkəyə çevirib. 2020-ci il Vətən müharibəsində qazanılmış tarixi Zəfər və 2023-cü ildə həyata keçirilmiş antiterror tədbirləri nəticəsində Azərbaycanın dövlət suverenliyi tam təmin olunub. Bu gün Qarabağ və Şərqi Zəngəzurun bütün şəhər və kəndlərində üçrəngli Azərbaycan bayrağı qürurla dalğalanır.
Prezident İlham Əliyevin də vurğuladığı kimi: “Biz əbədi olaraq bu torpaqlarda yaşayacağıq”. Bu fikir yalnız siyasi bəyanat deyil, həm də Qarabağa qayıdışın, quruculuğun və davamlı inkişafın əsas ideoloji xəttini ifadə edən mühüm mesajdır", - deyə professor bildirib.
Bölmənin digər xəbərləri
