Rusiya MDB ölkələrinin daxili işlər orqanları işçilərinin pensiya təminatı haqqında sazişdən çıxır
Moskva, 10 yanvar, AZƏRTAC
Rusiya MDB ölkələrinin daxili işlər orqanları işçilərinin pensiya təminatı və dövlət sığortası qaydası haqqında sazişdən çıxır.
AZƏRTAC xəbər verir ki, Rusiya Prezidenti Vladimir Putin Dövlət Dumasına MDB ölkələrinin daxili işlər orqanları işçilərinin pensiya təminatı və dövlət sığortası qaydası haqqında sazişin denonsasiyası haqqında qanun layihəsini təqdim edib.
MDB ölkələri daxili işlər orqanları işçilərinin pensiya təminatı və dövlət sığortası qaydası haqqında 1993-cü il dekabrın 24-də Aşqabad şəhərində imzalanmış saziş denonsasiya ediləcək. Saziş MDB ölkələri daxili işlər orqanları işçilərinin pensiya təminatına yönəlmiş öz qanunvericilik aktlarını qəbul edənə qədər, SSRİ vətəndaşları olan belə şəxslərin pensiya hüquqlarını qorumaq məqsədi daşıyırdı. Hazırda MDB dövlətlərində bu məsələ ilə bağlı milli qanunvericilik formalaşıb və artıq belə bir sənədə ehtiyac yoxdur.
Sənəddə qeyd edilir ki, Rusiya müqaviləni denonsasiya etdikdən sonra digər MDB dövlətlərinə daimi yaşamaq üçün köçmüş Rusiya Federasiyası vətəndaşlarının pensiya ödənişləri RF hökuməti tərəfindən təsdiq edilmiş qaydalara uyğun olaraq həyata keçiriləcək.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
