RUSİYA XƏZƏRYANI DÖVLƏTLƏR ÜÇÜN “KASFOR” KOLLEKTİV TƏHLÜKƏSİZLİK QURUMU YARATMAĞI TƏKLİF EDİR
AZƏRTAC-ın xüsusi müxbiri xəbər verir ki, mayın 19-20-də Həştərxan şəhərində Rusiya Federasiyasının Xəzəryanı dövlətlərdəki səfirlərinin Rusiyanın Xəzər siyasətinin öncül istiqamətlərinə həsr olunmuş müşavirəsi keçirilmişdir.
RF XİN-dən bildirmişlər ki, stats-katib - Rusiya xarici işlər nazirinin müavini Qriqori Karasin çıxışını bu mövzuya, habelə 2007-ci il oktyabrın 16-da Tehranda keçirilmiş ikinci Xəzər zirvə görüşünün yekunları ilə əlaqədar olaraq Rusiya diplomatiyasının vəzifələrinə həsr etmişdir. O demişdir ki, Xəzər regionunun Rusiya və onun xarici siyasəti üçün əhəmiyyəti son vaxtlar xeyli artmışdır, Xəzəryanı dövlətlərin əməkdaşlıq perspektivləri genişlənir.
Q.Karasin bildirmişdir ki, “Xəzər beşliyi” prezidentlərinin Tehranda apardıqları danışıqlar və zirvə görüşünün yekun Bəyannaməsi Xəzərdə gələcək əməkdaşlıq, habelə Xəzərin hüquqi statusunun razılaşdırılmasının başa çatdırılması ilə bağlı görüləcək işlərin əsasını qoymuşdur. Karasin demişdir: “Bu qərarları həyata keçirən Rusiya tərəfi hüquqi tənzimləmənin əsas məsələlərindən biri olan Xəzər hövzəsinin delimitasiyasına dair mövqelərin yaxınlaşdırılmasına çalışır, konkret təkliflər və əməli işlə Xəzərdə yeni hədələr və təhdidlərlə mübarizə sahəsində əməkdaşlığa töhfəsini verir, habelə Xəzəryanı dövlətlərin 2008-ci ildə Həştərxanda keçiriləcək hökumətlərarası iqtisadi konfransına hazırlaşır”.
Bildirilmişdir ki, Xəzəryanı dövlətlərin Xəzərdə yeni təhdidlər və hədələrlə üçüncü ölkə və təşkilatları cəlb etmədən müstəqil mübarizə aparmaq üçün yetərincə potensialı vardır. Q.Karasin demişdir: “Bunun üçün Rusiya tərəfi “Kasfor” kollektiv təhlükəsizlik qurumu yaratmağı təklif edir. Bu qurum hərbi ittifaq kimi deyil, Xəzəryanı dövlətlərin zəmanəmizin təhdidlərini və hədələrini neytrallaşdırmaq məqsədilə qarşılıqlı fəaliyyət mexanizmidir. Hazırda başlıca vəzifə Xəzəryanı dövlətlərin təhlükəsizlik məsələləri üzrə ekspertlərinin xüsusi görüşünün Bakıda keçirilməsi barədə prezidentlərin qərarını gerçəkləşdirməkdir”. O, görüş iştirakçılarına hökumət başçılarının müavinləri səviyyəsində hökumətlərarası iqtisadi konfransın Həştərxanda keçirilməsinə hazırlıq istiqamətində Rusiya tərəfinin gördüyü tədbirlər barədə məlumat vermişdir.
Diplomatlar, o cümlədən Rusiyanın Azərbaycandakı səfiri Vasili İstratov çıxışlarında Rusiyanın Xəzəryanı dövlətlərlə ikitərəfli əməkdaşlığı məsələlərinə toxunmuşlar. Diskussiyalarda Xəzərboyu sərbəst gəmiçilik rejiminin təmin olunmasının, ətraf mühitin mühafizəsinin, nərəkimilərin nadir genofondunun qorunub saxlanılmasının vacibliyi vurğulanmışdır. Bununla əlaqədar, Xəzərin dəniz mühitinin mühafizəsinə dair çərçivə konvensiyasının həyata keçirilməsində və bu sənədlə bağlı protokolların işlənib hazırlanmasında Rusiyanın fəal iştirakı xüsusi aktuallıq kəsb edir.
Müşavirə iştirakçıları Xəzərlə bağlı görülən işlərin mərkəzləşdirilməsinin əhəmiyyətini vurğulamışlar.
Bölmənin digər xəbərləri
